Rajnath Singh-a'n Malda a tlawh dawn

Union Home Rajnath Singh chuan January 18 hian West Bengal-a chi inkara buaina chhuahna, Malda district a tlawh dawn.

Union Home Ministry chuan West Bengal sorkar hnenah Malda buaina thleng chungchang report pe turin hian a lo ti tawh a ni. He buainaa inhnamhnawiha puh mi ṭhenkhat chu man an ni tawh a, buai chhuahna hmunah hian silaite hmehpuah nia sawi a awm bawk.

Malda district-ah hian Akhil Bharatiya Hindu Mahasabha leader Kamlesh Tiwari duh loh lantirna neih ṭumin mipui pungkhawm thinrim chuan police station an hal bakah, motor eng emaw zat an hal tel bawk. Lungawi lohna kawngzawh hi Muslim pawl, Anjuman Ahle Sunnatul Jamaat (AjS) huaihawt a ni.

Kamlesh Tiwari hian Muslim zawlnei, Prophet Muhammad chu khawvela mahni anpui kawp ching hmasa ber niin nikum December thla khan a lo sawi a ni. Hemi hma hian UP cabinet minister leh Samajwadi Party hruaitu Azam Khan chuan RSS member-te chu mahni anpui an kawp ṭhin niin a sawi bawk.

BJP chuan West Bengal Chief Minister Mamata Banerjee-i kaihhruai sorkar chu pawikhawihnaa inhnamhnawihte hum≠ah a puh. Nilaini khan West Bengal aṭanga BJP MLA awmchhun, Shamik Bhattacharya chu man a ni.

Hetihlai hian hian CM Banerjee chuan Malda-a buaina thleng chu chi inkarah ni loin, tualchhung mipuite leh Border Security Force (BSF) te inkar zawk niin a sawi. Hun eng emaw chen a ṭawngchhuah duh loh hnuah, Inrinni khan CM hian Malda chung≠chang hi a sawichhuak a, "Buaina thleng hi BSF leh mipui inkar a ni, state a inrawh lo a, chi leh chi inkar thil a ni bawk lo. Buaina chhuak pawh kan thunun tawh a ni," a ti.