Delh HC-in Odd-Even scheme kalpui chhunzawm a remti

Delhi High Court chuan Delhi sorkarin khawpui boruak bawlhhlawh tihziaawmna tura kumin January 1 aṭanga motor number kawpkim leh kawpkim lo a tlanchhawk tir, Odd-Even scheme a kalpui mek chu January 15 thleng hman chhunzawm a remti.

Delhi sorkar chuan he scheme hi ni 15 chhung, January 15 thlenga hman turin a ti a, mahse khawpui chhunga chengte'n veivahna kawngah harsatna an tawh avangin High Court-ah hian petition eng emaw zat thehluh a ni. Mahse High Court chuan petition thehluhte a ngaihtuah hnuah, inrawlh a tum loh thu a sawi a, hemi rual hian Delhi sorkar hnenah mipuite harsatna an thlente chu ngaihtuah turin a ti.

Delhi khawpui boruak bawlhhlawh lutuk chu nikum December thla khan High Court hian 'gas chamber' ang mai tiin a lo tehkhiin tawh. Hemi hnu hian Aam Aadmi Party sorkar chuan boruak bawlhlawh chak lutuk tihziaawmna turin motor intlanchhawk tirna tur scheme hi a duang ta a ni.

Chief Minister Arvind Kejriwal-a kaihhruai Delhi sorkar chuan motor inthlanchhawk tir a nih hnu hian motor khu avanga khawpui boruak bawlhhlawh chu 50% in a tlahniam tih a sawi.

Sorkarin motor intlanchawktirna scheme a kalpui hi motor neitute'n an zawm ṭha hle a, Transport Minister Gopal Rai chuan an scheme chu a hlawhtling hle tih sawiin, "He scheme kalpui a nih hnu hian traffic jam pawh a awm lo a, boruak bawlhhlawh pawh a ziaawm phah hle a ni," a ti.