Malda-ah BJP team kal phal lo

West Bengal-a tharum thawhna thlenna hmun, Malda khaw dinhmun enfiaha kal tum, member pathum awmna BJP team chu nimin zing khan rel station-ah dan an ni a, Kolkatta-ah kir tir an ni.

BJP team hian Pathianni kaltaa BJP hruaitu pakhatin zawlnei Mohammad-a chungchang a sawi avanga Muslim thinrimin lungawi lohna lantir a, tharum thawhna nasa tak chhuahna hmun hi tlawh tumin Kaliachak aṭangin Malda hi an pan a ni.

BJP hruaiute chuan boruak ṭha lo siam tuma kal tum an nih loh thu leh, khawchhung boruak ṭha zawk a awm theihna tura hma lak an tum thu sawi mah se, an thusawi chu an ngaihthlak sak duh lo niin an sawi.

Team member-te chuan an chunga West Bengal sorkar chet dan chu a lung≠awi thlak loh hle tiin an sawi.

BJP chuan Malda khuaa buaina chhuahna chhan dik tak chu hrechiang turin dikna an nei an ti.

Team hotu SS Ahluwalia chuan, "Dan leh thupek ngai pawimawhtu kan ni a, mipuite inkar boruak siamṭha a, tharum thawhna chawk chhuak tawh lo tura ngen tum kan ni," a ti.

Malda khuaa buaina chhuak chungchang chhuichiang tur hian BJP chuan member pathum awmna team a din a, team hruaitu atan hian party national secretary leh MP nilai, Bhupender Yadav ruat a ni. Member dang pahnihte chu MP ve ve, SS Ahluwalia leh BD Ram an ni.

BJP team hian tharum thawhna thlenna hmun chu tlawh a, thil awmdan an enfiah hnuah party president Amit Shah hnenah report thehlut tura tih an ni. He hmun hi January 18 hian Union Home Minister Rajnath Singh chuan tlawh a tum bawk.