VHP-in khaw hrang hrangah Ram temple din tum

Vishwa Hindu Parishad (VHP) thupuangtu, Sharad Sharma ramchhung khaw hrang hrangah Ram temple din an tum thu a sawi.

Sharma chuan April 15 aṭang hian Ram Navami pawlin ni sarih awh tur Ram Mahotsava an hman ṭan tur thu sawiin, "Hemi chhung hian khaw tinah Lord Ram chawimawina hun hman a ni ang" a ti.

VHP hotu chuan, "Tunhma aṭangin Ram Mahotsava hi kan lo hmang tawh ṭhin a, he pawl hi thingtlang khaw 70,000-75,000 velah a inzarpharh tawh a ni," a ti. An hmachhawp atan chuan thingtlang khaw nuai 1.25 tuam chhuah an tum tih a sawi bawk.

Sharma chuan Ram temple an sak tur chu an duhthu ngawt ni loin, court phalna nen zela sak an tum tih a sawi a, August-September vel hian phalna an hmuh theih a beisei thu leh, Muslim leh Hindu pawl remtihna pawh lak zel an tum tih a sawi.

BJP hruaitu Subramanian Swamy pawhin Ayodhya-a Ram temple sak tum chu kumin kumtawp hma ngeia an thawh ṭan theih a beisei thu a sawi.

Ayodhya-a Ram temple sakna tur ram chungchanga Muslim leh Hindu-te inkara buaina awm mekah Supreme Court thutlukna chu tihchhuah thuai a beisei thu leh, hnehna an chan ngei a rin thu a sawi bawk.

Swamy chuan Ayodhya-ah hian Sarayu lui kamah mosque pawh sak theih a ni dawn tih a sawi a, mahse Babur-a hming chawitir erawh a theih loh a ni, a ti.