Indo-Pak talk neih tur ṭhulh a ni lo: Ajit Doval

National Security Adviser Ajit Doval chuan India leh Pakistan-in remna zawnga inbiakna an neih tur ṭhulh a nih thu a sawi tia chanchinbu pakhatin a tarlan chu a sawi loh thu a tarlang.

Nimina chhuak Hindi chanchinbu, Dainik Bhaskar chuan Ajit Doval kawmna chungchang tarlangin, hetah hian Doval chuan, "Pakistan sorkar hian Pathankot airbase beihnaa inhnamhnawihte chunga hremna a lekkawh hma leh, Pakistan chetdana India a lungawi hma chuan ram pahnihte hian peace talk an nei thei lo ang. January 15-a Indo-Pakistan secretary level meet neih tur pawh ṭhulh a ni," tia a sawi thu a chhuah a ni.

Mahse interview chung≠chang hi tihchhuah a nih hnu lawkah, Doval chuan hetiang thu a sawi loh tih a sawifiah nghal. Dainik Bhaskar chanchinbu chu interview a neihpui a hriat loh thu NDTV hnenah a hrilh a ni.

Doval chuan ram pahnih≠te'n foregin-secretary level inbiakna an neih tur hi a hun ruatfel a la ni lo tih a sawi a, he inbiakna neih tur hi firfiakte'n airbase an beihnaa inhnamhnawihte chunga Pakistan-in action a lak hunah neih a ni ang, a ti.

Pakistan Foreign Ministry pawhin India chuan airbase beih chungchanga a thil hriatte chu a hriattir tawh a, sorkar pawhin India sorkarin a thil hrilh hmang hian hma a la nghal niin a sawi.

Pakistan Adviser on Foreign Affairs Sartaj Aziz chuan foreign secretary-te inbiakna neih tur hi
ṭhulh a la ni lo tih a sawi a, inbiakna neih hun atan hian Janua≠ry 15 hi an rawt tawh a, hei hi India chuan a pawm thu emaw, a pawm loh thu emaw a la sawi≠chiang lo niin a sawi.

Pakistan Prime Minister Nawaz Sharif-a chuan thil awmdan uluk taka an chhui mek thu leh, thudik tak an haichhuah ngei tur thu a sawi.

India-in Pakistan hnenah evidence a pek zingah hian Pathankot airbase beitu firfiakte'n anmahni tirtu Pakistan ami an biakna eng emaw zat leh, kahhlum an nih hnua an ruang aṭanga Pakistan siam hmanraw ṭhen≠khat an mante pawh a tel.