Ruah sur nasain Gujarat leh Madhya Pradesh tibuai

Gujarat hmun tam tak chu ruah sur nasa avanga tuilianin a tibuai a, khaw ṭhenkhatah tui tling a tam avangin nunphung a tibuai nasa hle.

Ahmedabad-ah darkar 12 chhunga ruah mm 76 zet a sur avangin khaw chhungah tui a tling a, thuneitute chuan fimkhur thil thu-ah lei hnuai kawngte an khar. Narmada lui chhehvel khaw tam takah lui tui a len nasat avangin mi 9,600 sawn chhuah ni tawhin, mi 207 chhanchhuah ngaiin an awm bawk.

Indian Meteorological Department (IMD) chuan Panchmahal, Dahod, Kheda, Aravalli, Mahisagar, Banaskantha leh Sabarkantha district tan red alert chhuahin, heng district-ahte hian ruah nasa zawk a la sur dawn niin an sawi. Ruah sur hian Pathianni zing khan Sardar Sarovar Dam (SSD) tikhatin, tui a liam nasa a, hei hian Narmada district-a hmun hniam laiah te chuan tuilian a siam a ni. Narmada lui bakah hian Orsang, Heran, Mahi, Meshri leh Panam lui te chu a lian nasa hle. Chhanchhuah hna thawk tur hian National Disaster Response Force (NDRF) team hnih tirh chhuah an ni a, Bharuch, Rajkot, Junagadh leh Vadodara-ah te team khat ṭheuh tirh an ni bawk. Heng bakah hian State Disaster Response Force (SDRF) team eng emaw zat tirh ni bawkin, Army-te pawh an inralring reng bawk a ni.

Madhya Pradesh pawhin ruah sur nasa avang hian harsatna tawk ve bawkin, Malwa leh Nimar region bakah Khargone, Barwani, Dhar, Khandwa, Burhanpur, Alirajpur leh Indore district-ah te nunphung tibuai khawpin tui tling leh tuilian a thleng a, mi 8,700 chu hmun him lamah sawn chhuah an ni. Jhabua district-ah chuan tuilian hian mi pariat lain, ruang pahnih hmuh a ni tawh a, hmeichhe pathum leh naupang pathum ruang erawh zawn mek a ni thung. Malwa leh Nimar region aṭang hian bawng note 2,637 leh mihring 8,718 chu sipai 610 leh home guard 801 te'n hmun him lamah sawnin, State Disaster Emergency Response Force (SDERF) chuan chhanchhuah hna vawi 89 zet an thawk tawh bawk a ni.

Official-te chuan Khargone-ah hian mi 2,017 te chu relief camp 45-ah dah an nih thu leh, Dhar district-ah mi 1,993 chu hmun sang lamah sawn an nih thu an sawi. Indore district aṭang hian mi 227 chhanchhuah an ni a, Narmada luiin a tihbuai, Khadwa district-ah chuan mi 500 hmun him lamah sawn chhuah an ni bawk.