TOEFL test-tu pung nasa

Educational Testing Service (ETS) zir chianna aṭanga a lan danin, Covid-19 hri leng a ziaawm hnu, khawvel ram hrang hrangte an inzin pawh leh theih hnuah, India mi, Test of English as a Foreign Language (TOEFL) test-tu chu 59% zetin an pung.

TOEFL hi pianpui ṭawng atana English hmang lote'n ram danga lehkha zir tura an kal hmaa English-ah harsatna an neih leh neih loh enna a ni a, inbiakna atan leh lehkha zirna huang atana English an thiam tawk leh thiam tawk loh test-na atan hman a ni.

India mi TOEFL test-tu hi 2021 khan 53% in an pung a, 2022 khan 59% zetin a pung leh a ni. Khawvel pum huapa lakin TOEFL test-tu 12.3% hi Indian an ni tihna a ni. ETS India and South Asia, Country Manager, Sachin Jain chuan,"Heng data aṭanga a lan dan chuan India mite hian khawvel ram dang an hmuh chakna hi a sang hle tih a hria theih. India mi test-tu an pun rual hian India mi, ram danga pem leh lehkha zir tur pawh an pung ve tho a, a inmil thei chiah a ni. US leh UK mai ni loin khawvel ram dang atana test pawh an pung nasa," tiin, Singapore, Australia, France leh Sweden te chu India mite chuan an bawh ṭan niin a sawi.

Union Education Ministry-in a tarlan danin, India mi ram danga lehkha zir tura kal chu 2022 khan kum ruk chhunga an tam ber ṭum tlingin, nuai 7 leh singnga an tling. US-a lehkha zir tura awm tam lamah China a khum tawh bawk niin a tarlang. TOEFL test-tu zingah hian New Delhi, Mumbai, Bengaluru, Pune, Hyderabad, Gurugram, Chennai, Kolkatta leh Ahmedabad aṭangin an tam ber a ni.