Sorkarin thla thum chhung atan air fare siam dan chin tur bithliah sak

Hun rei tak lockdown avanga thlawhtheihnate an service theih loh hnu­ah, sorkar laipui chuan lockdown kalpui mek zawh hma, May 25 aṭangin ram chhung bikah service a phalsak. 

Airlines-te tan domestic flight service a phalsak rualin, sorkar chuan hemi atana kaihhruaina pawh a siam nghal bawk. Seat awm zat hmun thuma ṭhena hmun khat chin phurh phalsak niin, thlawh­theihna chhungah ei tur sem a ni lo ang. Thlawh­theihna chuan man pawh a minimum leh maximum a siam nghal bawk a, hei hi thla thum chhung atana tih a nih thu aviation minister Hardeep Singh Puri chuan a sawi. 

Ticket man bithliah hi thlawhtheihna thlawh rei dan azirin category pasarihah ṭhen a ni.

Thlawhtheihnaa chuang turte chuan an mobile phone-ah Aarogya Setu app an neih vek a ngai a, airport terminal building an luh hmain thermal screening zone an paltlang vek tur a ni. Khawsik sang, thawk lama harsatna nei leh khuh nasate chu airport an luh phalsak a ni dawn lo. 

State sorkarte chuan khualzin leh airline crew-te tan public transport leh private taxi-te a buatsaih sak a ngai dawn a, hemi atana thlan bikte chauh chu airport-a hruai leh airport aṭanga an phur chhuah phalsak an ni ang. Passenger-te chuan hmai­tuamna leh kutkawr an vuah vek a ngai bawk. 

Entry gate, screening zone leh terminal-ahte social distancing khauh taka kalpui tur a ni a, luhkaah mat/carpet bleach-a tihhuhte chu khual­zinte pheikhawk bun tih thianghlimna turin dah vek an ni ang.