Pathankot case: NIA-in Gurdaspur SP thu zawtfiah

Firfiakte'n Pathankot airbase an beih chungchang chhuina kal zelah, National Investigation Agency (NIA) chuan Gurdaspur Superintendent of Police (SP) Salwinder Singh chu nimin khan thu an zawhfiah leh.

NIA hian Thawhṭanni khan nilengin Delhi-a an headquarters-ah Singh hi thu an lo zawt tawh a, nimin khan an ko nawn leh a ni. Singh bakah a eisiamtu, Madan Gopal pawh Punjab-ah NIA investigator-ten thu an zawt bawk.

Gopal hi Delhi-ah thu zawhfiah tura hruai a nih thuai tur thu Home Ministry thupuangtu, Satyendra Garg chuan a sawi.

Garg chuan, "Salwinder Singh hi airbase beih a nih dan hrechiangtu ber a nih avangin thu hi zawhfiah a ni a, a ṭul dan azirin ni dangah pawh koh leh a la ni ang," a ti.

NIA hian he thubuai kaihhnawiha thuhretu dang leh firfiakte chungchang hriate pawh thu an la zawtfiah dawn bawk a ni.

Salwinder Singh hian investigator-te hnenah December 31 khan firfiak pali-te'n an rukbo thu leh, a hnuah a eisiamtu nen hian an mit tuamsakin, kutkawl an buntir hnuah an kalsan thu a hrilh. Mahse firfiakte hian kut thlak miah loa an kalsan avang hian Singh hian rinhlelh a kai phah hle.

Singh-a ṭhianpa, tlereuh lama sumdawng Rajesh Verman pawh firfiakte kut aṭang hian a tlanchhuak a, ani pawh hi thu zawhfiah a ni tawh bawk.

Intelligence agency-te chuan Salwinder Singh-a pass call data record (CDR) pawh uluk takin an zirchiang a, drug mafia lam nena inzawmna an neih leh neih lohte an chhui a ni.

Airbase beihna chhuitu, NIA team-a member 10-te chuan pawikhawihna thlenna hmun aṭangin thil dang hmuh belh an nei a, AK-47 magazine pakhat, mobile phone leh binocular-te an chhar belh tiin union home ministry chuan a tarlang.

Pawikhawihtu firfiak pali kahhlum takte nihna dik tak hriatchhuah a nih theihna turin Interpol hnenah pawh black corner notice pek a ni tawh. Hemi hmang hian Pakistan chu firfiakte chanchin a hriat angte hriattir turin na zawka nawr theih a ni dawn a ni.