Odd-even scheme hnuaiah dan bawhchhia mi 753 chawitir

Delhi sorkarin khawpui chhung boruak bawlhhlawh zel tur tihziaawmna tura January 1 aṭanga motor number kawpkim leh kawpkim lo a tlanchhawk tirna, odd-even scheme chu January 15 thleng hian hman a ni dawn. He scheme hman a nih hnu hian dan bawhchhia mi 753 chu chawitir an ni.

Police-te chuan scheme kalpui chhunga dan bawhchhia, motor 209 an man a, transport department in 304 leh Revenue department-in 240 an man bawk tiin official-te chuan an tarlang.

Official-te chuan motor intlanchhawk tir vang hian Thawhṭanni khan mi 21,85,271 in metro service an hmang a, scheme hman a nih hma aiin metro service hmangtu hi 4.13% in an pung a ni.

Delhi Chief Minister Arvind Kejriwal-a chuan Times of India-ah article ziakin, Odd-Even scheme hlawhtling taka kalpui a nih chungchang a tarlang.

Kejriwal-a chuan Delhi mipuiin an scheme siam an zawm ṭhat dante, AAP sorkarin ro relna ṭha tak a kalpui theih dante a tarlang.

CM chuan ram dangte an tih theih ang chu India mipuite pawhin an tih theih vek thu tarlangin, system ṭha leh mumal bakah hruaitu inpezo tak an neih phawt chuan India mite chuan theihna nasa tak an nei a ni, a ti. Odd-Even scheme pawh a hlawhtlin ngei ringin khawpuia chengte chung≠ah rinna an nghat ngam tih a sawi.

Scheme hi ni 15 hman tura ruahman niin, Janua≠ry 15-ah a tawp ang. Mahse CM chuan sorkar≠in ni 15 chhunga an thil tawnte hi thlirkirin, a hnu lamah pawh ruahmanna ṭha leh felfai zawk nena kalpui leh an tum thu a sawi.