Parliamentary standing committee on home affairs chuan August 16 aṭanga 22 inkar hian Jammu and Kashmir leh Ladakh tlawhin, bial chhung dinumunte an zirchiang dawn.
Party hrang hranga MP 28 telna panel hian Line of Actual Control hrula outpost-te chu tlawh an tum a, mahse India leh China sipaite indaidanna, friction point erawh nikum May thlaa inhmuhthiam lohna avangin an tlawh dawn lo tih an sawi.
August 17 leh 21 inkar hian panel member-te chuan official, tualchhung mite leh stakeholder-te an kawm dawn a ni.
Congress member Anand Sharma kaihhruai panel hian August 16 hian Leh,Ladakh an thleng ang a, August 17 hian inbiakna an neihpui dawn a ni. August 18, 19 leh 20 hian MP-te hian Srinagar-ah meeting an nei leh ang. August 21-ah stakeholder-te hmuin August 22 hian Delhi-ah an let leh dawn a ni.
An cham chhungin panel hian India-Pakistan ramri leh India-China ramri-a CRPF, ITBP leh BSF te hnathawhdan an thlir ho dawn a, Panel member-te hian China ramri-a ITBP outpost ṭhenkhat leh Srinagar-a CRPF camp-te an tlawh dawn a ni.
Rajya Sabha secretariat chuan zin veivahna a ṭul leh pawimawh dangte lo ruahman lawk turin Union home ministry a ngen.
Nikum October thla khan parliamentary committee-in Ladakh-a high-altitude-a sipai dahte, thlasik khawvawt tak hnuaiah eng angin nge an thuam leh hmanruate pek an nih dante enfiah tura parliament committee-in tlawh a rawtna chu sorkar laipui chuan a lo dan sak a ni. CAG report chuan Siachen leh Ladakh-a hmun sang tak leh vawt taka dah, sipaite chu vur sur kara an chetvelna turah snow goggle leh multi-purpose boot an indaih lo hle niin a sawi a, hei hi House panel chuan enfiah a duh a ni. Mahse defence ministry chuan China nena ramria boruak ṭha lo neih laia Parliament committee-in Ladakh lo tlawh chu thil tihchi a ni rih lo tiin a sawi.
