Mizo Zaimi Inzawmkhawm (MZI) General Headquarters chuan nikum lama an lo buatsaih tawh, Inter High School & Higher Secondary School beat contest chu zirlaite ngaihhlut a hlawh hle tih hriain leh education-in a tum 'All round development' tihhlawhtlinna kawng a nih tel bawk avangin kumin hian "2nd Inter HS & HSS Beat Contest" an buatsaih leh tur thu Thawhlehni khan an sawi.

Nikum August khan a vawi khat nan Inter HS & HSS beat contest hi Vanapa Hall-ah buatsaih a ni a, school hrang hrang aṭangin beat group 13 an tel a, an zinga beat group pathum hi Aizawl pawn aṭanga tel an ni. Lawmman atan nikum khan pakhatna Rs 50000/- pahnihna Rs 30000/- leh pathumna Rs 10000/- sem a ni a, a tel zawng zawngin consolation prize 1000/- an dawng bawk.

Kumin IHS&HSS beat contest-ah lawmman hi tihpun vek a ni dawn. Pakhatna in Rs 70,000; pahnihnain Rs 50,000 leh pathumnain Rs 30,000 an dawng dawn a; hei bakah Top 7 chin hnenah Rs 10000 ṭheuh pek an ni ang. Nikum lama sem tel loh mimal lawmman pawh sem tel a ni dawn bawk a, discipline tina tiṭhate chu Rs 1000 leh citation hlan an ni ang.

2nd IHS&HSS hi September 9-10 thleng awh tura ruahman niin, zirlai tana inelna buatsaih a nih avangin hun rei tak awh tura tih theih a nih loh thu MZI chuan an tarlang. Tel tumte chuan an music video demo theh lutin judge ten thlifimin a tiṭha 10 an lo thlang dawn a; heng thlitfimte hian Vanapa Hall-ah intihsiakna live-in an nei dawn a ni.

Beat Contest judge atan hian Chief Judge-ah John LT Sanga; Guitar Eric Renza; Vocal Puia; Keyboard Samueala; Bass Rema; Drums Patea te an ni ang. Contest-a tel tumte chuan English emaw Mizo hla emaw an sakna video chu phone number 8794592167 or 9774954386 ah theh luh tur a ni a, video hi September 3 thleng theh luh theih a ni.