PSG-in rapper an sawisel

French club lian, Paris Saint-Germain chu rapper M.I.A. chungah an lungawi lo hle a, lehkhathawn sei zet mai, phek thum lai mai chu Paris Saint-Germain hian M.I.A. record company hnenah an thawn a, a thlalak pawh twitter-ah an dah nghe nghe.

Rapper M.I.A. hian PSG jersey chu a music video-ah siam danglam hretin a ha a, hei hi PSG chuan an duh lo hle a ni. M.I.A. hian a music video 'Borders'-ah PSG jersey hmaa 'Fly Emirates' tih inziak chu tidanglamin 'Fly Pirates' tiin a thlak a, a ha a, PSG an lawm lo hle.

PSG-in lehkha an thawnah hian M.I.A. chu a music video, PSG jersey lanna chu tichhuak tawh lo turin an hriattir a, chu mai bakah an club thil leh an brand te an phalna la loa tidanglam leh phochhuak mai mai tawh lo turin an hrilh bawk. PSG chuan a thil tih avang hian M.I.A. hi pawisa chawi turin an phut bawk.

M.I.A. chuan PSG jersey a hakna chhan a sawiah chuan firfiakten Paris an beiha tuarte a tuarpuizia a lantirna a ni tih a sawi a, he a music video hi firfiakte beihna tuarte tana ni an hman ni, Paris Memorial Day-ah tak a chhuah bawk avang leh, heng mite a tawrhpuizia a lantir theihna a nih avangin PSG jersey hi a ha tih a sawi.