Cancer vangin Alan Rickman a thi

Actor hlawhtling zinga mi, Harry Potter film te, Die Hard leh film tam taka chang tawh, British actor lar Alan Rickman chu Ningani khan cancer natna avangin a thi.

Alan Sidney Patrick Rickman hi kum 1946 February 21-a piang kha a ni a, kum 69 mi niin, London-ah a thi a ni. Alan hian a channa film, tihchhuah mai tur chu a hmu hman dawn ta lo a, a channa thar ber hi Alice Through the Looking Glass a ni a, May thla hian US-ah chhuah ṭan a ni ang.

Movie khawvela a tal luh hnuah hlawhtlinna tam tak a chang tawh a, Golden Globes a la tawh a, Emmy Award a dawng tawh bawk. Screen Actors Guild Award pawh a lo hum haw tawh a ni. Robin Hood film-a hlawhtling taka a chan avangin British-ho award ngaihhlut, BAFTA pawh a lo dawng tawh bawk.

BBC tihchhuah, kum 1974-a mi, Romeo and Juliet aṭang khan mi chhinchhiah a hlawh ṭan a, he film-ah hian Tybalt-a lem a chang. Hemi hnu hian film tam tak a chang a, kum 1988-a Die Hard a chan khan movie khawvelah hriat a hlawhtir zual a, hetah hian misualpa, Hans Gruber lem a chang a ni. Kum 1991-a Robin Hood: Prince of Thives-ah khan Nottingham Sheriff lemah a chang a, Die Hard with a vengeance-ah khan a role ngai bawk a chang leh. Harry Potter-ah Severus Snape lema changin, Harry Potter and the Prisoners of Azkaban, the Goblet of Fire, Order of the Phoenix, Half-Blood Prince, Deathly Hallows Part 1 leh 2 ah te khan a chang.

A thih thu hian khawvel a deng chhuak nghal a, Harry Potter-a a chanpui hrang hrang leh filmstar rualten an uizia thu an sawi.