Box Office : 'The Nun II' leh 'Haunting in Venice' an inum

North America box office-ah 'The Nun II' leh 'Haunting in Venice' te chu an in um nasa hle.

'The Conjuring' franchise nine installment, 'The Nun II' chu a kar hnihnaah no. 1-a la awm zui mah se, entu tlakhniamnaa hi 55% a tling a, tlangzarh thar 'Haunting in Venice' chuan a rawn um pha teuh hle. 'The Nun II' hian USD mtd 14.7 lak luh belhin, domestic-ah USD mtd 56 leh international-ah USD mtd 102.3 a la lut tawh.

'Haunting in Venice' chuan tlangzarh karah USD mtd 14.5 a la lut a, no.1 a rawn ni teuh hle. Agatha Christie novel behchhana siam niin, Kenneth Branagh chu director leh a changtu a ni nghal. Branagh hi Belgian detective Hercule Poirot lema a chan vawi thumna a ni. Murder mystery film hian international-ah USD 22.7 a la lut thei bawk.

"The Equalizer 3" chuan USD mtd 7.2 la lutin no. 3-ah a tla thla a, no.4-ah USD mtd 4.7 la luttu "My Big Fat Greek Wedding 3" awmin, July thlaa tihchhuah daih tawh 'Barbie' chuan USD 3.90 a lak luh belh leh a, no.5 dinhmun a la luah pha. 'Barbie' hi film chhuak tawh zingah North America-a sum la lut tam 11-na a ni tawh a ni.

Bollywood film, Shah Rukh Khan channa 'Jawan' chu Top 6-ah a la lang bawk. 'Blue Beetle', 'Gran Turismo', 'Oppenheimer' leh 'Teenage Mutant Ninja Turtles: Mutant Mayhem' te chu Top 10-ah an la lan chhunzawm bawk.