Sept 29-ah MSSC E-Sports Rising Cup 2023 ṭan dawn

Mizorama e-Sports tournament lian ber leh changtlung ber tur, Mizoram State Sports Council leh Rip Mizo Gaming-te ṭangkawpin an buatsaih, MSSC E-Sports Rising Cup 2023 chu September ni 29 aṭang hian khelh ṭan a ni dawn.

MSSC E-Sports Rising Cup 2023 hi ṭhuang hnih - Institution leh Open round-ah ṭhen a ni. Institution round-ah hian Mizorama college leh sikul ṭhenkhatte sawm an ni a, pakhatna hian Grand Final an lut nghal a, pahnih aṭanga palina te'n Semi-final an lut nghal bawk. Institution round hi September ni 16 khan khelh a ni a, Pachhunga University College chu pakhatna niin anni hian Grand Final an lut tawh a ni. Open category bik chu September 29 aṭang hian an khel ṭan dawn a ni. Grand Final hi October 30-ah Hawla Indoor Stadium, Republic Vengthlangah khelh a ni ang.

Tournament-a pawisa fai sem râl tur hi cheng nuai hnih lai niin, Champion team hian pawisa fai cheng nuai khat leh trophy an dawng dawn. Pahnihnain ₹50,000) leh pathumnain ₹25,000) an dawng bawk ang. Palinain Rs. 15,000 leh panganain ₹10,000 an dawng dawn bawk a ni.

Mimal lawmman (MVP) leh ṭawiawmtu nei ṭha ber team hnenah ₹5,000 ve ve pek an ni bawk ang.

MSSC e-Sports Rising Cup 2023 hi registration tih mek zel niin registration hi online in a la tih theih zel. Online registration hi September 27 hian khar a ni ang.