Ṭhazual gospel-ah Bethsy A hlawhtling ber

Kum 2015 chhunga gospel singer zingah Bethsy Lalrinsangi tluka hla hit ngah an awm lo a, Ṭhazual Gospel huang chhungah ani tluka pakhat ni thei hla nei hnem an la awm lo.

Kum 2015 chhung khan Bethsy hming hi Ṭhazual Faknaa pakhatnaah hla pali hmangin vawi ruk ngawt a lang thei a, Ṭhazual chart siam achinah kum khat chhunga ani tluka pakhatna hauh thei hla nei hnem an la awm lo. Nikum khan a single hla pahnih 'Min hmangaih si' tih leh 'Hrilhfiah sen rual loh' te chu pakhatnaah an awm thei ve ve. 'Min hmangaih si' hla hian pakhatna hi a zawnin
ṭum thum a hauh thei a, 'Hrilhfiah sen rual loh' hi pakhatnaah vawi khat a awm bawk. Hei bakah hian TBC Zaithanpuia nena an sak 'Isua ka ṭhian a ni' tih hla kha nikum chhung khan pakhatna hauh hman loh mah se nikum hmasa, kum 2014 khan pakhatna a hauh a ni. Pensy leh Temi Sailo te nena an sak 'Mamawh chhanna' chu pakhatnaah vawi hnih a awm bawk. He hla hi nikum chhunga top 10-a hla lang zinga a vawi khat lannaa thleng sang nghal ber hla a ni a, 'Mamawh chhanna' hi a vawi khat lannaah palinaah a lang nghal thei.

Bethsy hian kum 2015 chhung khan top 10-a lang thei hla pali, ama mimala a sak leh midang nena an sak tiamin a nei.

Pensy chu pakhatna hauh ngun ber dawttu a ni a, Temi Sailo nen an intluk. Ama single leh trio-in pakhatnaah a hming ṭum li a lang. 'Chhan tlak ka ni em ni' hla hmang khan pakhatnaah vawi hnih a awm a, he hla hi kum 2015 chhunga Fakna bika pakhatna hauh hmasa ber a ni bawk. Bethsy leh Temi Sailo te nena an sak nen pakhatnaah vawi li lai a awm. Temi Sailo pawh hi pakhatnaah vawi li tho awmin, ama hla 'Kraws thu' kha pakhatnaah vawi hnih a awm a, trio-in vawi hnih a lang bawk.

Albatross vocalist, Elijah Lalrinawma, Rintea tia kan hriat lar chuan chart-a pakhatna vawi thum lai a hauh thei a, pakhatna hauh ngun ber pathumna a ni. Rintea hian 'Min thlang tawh si' tih hla hmangin pakhatna a zawn loin vawi thum a hauh thei. Rintea hla phuah 'I ropui nan' tih chla, Vanlalpari sak chu pakhatnaah a awm bawk.

TBC Zaithanpuia chu pakhatna ṭum hnih a ni thei. TBCA hi nikum khan chart-ah hian a hla, mimal leh duet-in, pathum lai kan hmu. Bethsy nena an sak 'Isua ka ṭhian a ni' tih chu top 10-ah a lang a, 'Fak zel che ka duh' tih, a solo hla hmangin pakhatna vawi khat a luah a, 'Min tlan ta' hla hmangin pakhatna vawi khat a ni bawk.

Maggie chuan nikum chhung khan top 10-a lang thei hla pahnih a nei. 'Hmangaihna par tlanin' tih hla hmangin pakhatna pawh ṭum hnih lai a hauh a, 'Min siam thar leh rawh' tih hla chu top 10-ah a lang bawk. Hla mal, chart-a lang rei ber chu Vanlalpari sak, Rintea phuah 'I ropui nan' tih hla kha a ni a, nikum chhung khan chart-ah vawi 13 a lang a, pakhatnaah vawi hnih, pahnihnaah vawi li, pathumnaah vawi hnih, palinaah vawi khat, paruknaah vawi hnih leh, pasarihna leh pariatnaah vawi khat ve ve te a lang.

Pakhatna hauh thei ni mimal≠in nikum chhung khan mi 12 an awm a, Betea, Hlimhlimi, Grace Lalchhanhimi, C. Lalrindiki leh Lalchhanhimi Palian te hi pakhatna hauhtu dang an ni a, Grace leh Hlimhlimi te hian pakhatna ṭum hnih ve ve an hauh.