TBCA'n pakhatna a rawn luah

Feli Thangluahin a hmun a luah zo lo a, TBC Zaithanpuia'n pakhatna a rawn luah ta thung. TBCA hla 'Sul ni leh thla' chu pathumna aṭangin pakhatnaah a rawn kai a, pahnihna a rawn kal k‚n.

Hontrade International Ṭhazual Faknaa pakhatna luahtu TBC Zaithanpuia hla 'Sul ni leh thla' November 9 aṭang khan chart-ah hian a rawn lang ṭan a, pakuanaah bul a rawn ṭan. November 23 khan pasarihnaah a chho a, December 7 khan paruknaah kai chhoin, kum 2015-a Fakna chart tihchhuah hnuhnung berah khan panganaah a ṭhu. Kum 2016 kan kaia Hontrade International Ṭhazual Fakna tihchhuah hmasak ber, January 4-ah khan pathumnaah awmin, tunah pahnihnaah a rawn chuang chhuak ta a ni.

'Sul ni leh thla' hla hi Bawitea (L) phuah a ni a, mi tam tak chuan kan hria ang a, nu leh pa lamte chuan kan lo sa viau tawh
ṭhin ang. He hla hi kum 1955 vela Hakha
ṭawnga a phuah a ni a, kum 1972 khan KṬP General Conference Hla Buah pawh telh a lo ni tawh nghe nghe. Ṭhalai ngainat lam chi a khawrh deuh hnuah TBCA hian nu leh pa ngainat tur lam a rawn sa thung a, hei hi a pain sa tura a ngen anga sa a ni a, a thiam a, a hlawhtlinpui ta hle a ni.

TBCA hian kumthar atan hian intiamna khawng tak a nei. Kan hriat angin TBCA hi a rawn lar tirh chuan lenglawng leh lengzem a hrut ṭhin a, mahse kumin aṭang erawh chuan Pathian fakna hla lo chu sak a tum tawh lo. December thla khan damlohnain a tlakbuak a, kumhlui pawh sawmna a hmuh tam tak tihlawhtling thei loin, damloin hun a hmang a ni. A damloh chhung hian a ngaihtuahna nasa taka hmangin, Pathianin a kaihhruai nasatzia a hmuh thiam phah a, Pathian tana a tih theih hlu ber nia a hriat, a fakna hla chauh sak a tum ta a ni. "He khawvela ka lo pian chhuah aṭanga tun hun thlenga a hma≠ngaihna rinawm, chuai ve ngai loa min enkawlna ka hre chiang em em a, Pathian chuan lainattu, hmangaihtu leh duhsaktu min pein, khawngaihtu, belh tur leh ṭhian
ṭha min pe a, malsawmna tam takin min vur bawk. Heng zawng zawng avang hian ka theihna zawng zawnga amah fak mai loh chu tih theih dang ka nei lo a ni," a ti.

Feli Thangluah hla 'Kei min thlang' tih chu pakhatna aṭangin pahnihnaah a chhuk a, a hmaa palina, Grace Lalchhanhimi hla 'Rorelna ni' chu pathumnaah a rawn chho thung. Pakhatna pawh lo hauh tawh Bethsy Lalrinsangi hla 'Hrilhfiah sen rual a ni lo' tih chu pahnihna
aṭangin palinaah a tawlh thla a, Emily Vanlaltluangi hla 'Ka zin kawng' chu panganaah bawk a awm. Top 10
aṭangin Rintea hla 'Min thlang tawh si' a tawlh chhuak a, Vohbik music video thar 'Jordan lui malin ka kai lo ang' chu pakuanaah a rawn lang thar.

Hontrade International Ṭhazual Fakna

1. TBCA -

Sul ni leh thla

2. Feli Thangluah -

Kei min thlang

3. Grace Lalchhanhimi -

Rorelna ni

4. Bethsy -

Hrilhfiah sen rual a ni lo

5. Emily Vanlaltluangi -

Ka zin kawng

6. Zorinsanga Sailo -

Ka hmangaih hma pawhin

7. Temi Sailo -

Ka lungawina Isua

8. Esther Khiangte -

I tan ka awm

9. Vohbik -

Jordan lui

10. Lalchhanhimi Palian -

Nitin Isua