Naktuk zanah Comedian Search Grand Finale

Mizoram TV show ngaihhlut leh lawm hlawh tak, Comedian Search 2023 chu a hmawr bawk a ni dawn ta. Naktuk, September 22 zan dar 8:00-ah Grand Finale neih a ni dawn. Kumin LPS Comedian Search main sponsor hi LH Thanga Enterprise a ni.

LHTE LPS Comedian Search 2023 hi August 17 aṭang khan ṭan a ni a, fiamthu hmanga intihsiaknaa tel tur hian mi 70 chuangin hming an pe lut. Kuminah hian judge-te chu Darrokima, Lalhruaitluanga Chawngte leh H. Rotluanga (Mapuia) te an ni a, host hi Lalrinpuii niin, co-host Zosangzuala a ni.

Grand Finale-ah hian top 5-te an inel leh dawn a, September 16 zan khan Final first leg hi an lo nei tawh a ni. Naktuk zana inel leh tur, top 5-te chu- Lalchhanhima Sesawng/Ṭhuampui, Zohmangaiha Champhai Ruantlang/Edenthar, Vanmalsawma Tuikual North, H. Kapkima Ramhlun North leh, Lalnunmawia Ratu/Chhiahtlang te an ni. LPS-1 ah pek chhuah a nih dawn a, LPS en thei lote tan Runmawi App-ah live-a en theih a ni bawk ang.

Comedian Search-a pakhatna hian lawmmanah pawisa fai Rs nuai 1 bakah, Suzuki Access 125, TV, 1.6 KW Solar Hybrid Power Backup System a dawng dawn a ni. Pahnihna hian Rs 50,000, Refrigerator, Solar Heater 200 ltr. per day a dawng dawn a, pathumna hian Rs 30,000, Washing Machine, Solar Heater 100 ltr. per day a dawng bawk ang.

Comedian Search hi Mizorama TV show kal tluang rei ber niin kum 2008 aṭang khan buatsaih ṭan a ni. Covid-19 hri leng avanga kum 2020 kuma an awl tih loh chu kum tin buatsaih chhoh niin, kumin hi season 15-na a ni.