The Tax Collector-in sum a lalut tam ber

Kar tawp liam ta Box Office-ah sum chevel a la tlem hle a, theatre inhawng pawh a la tlem hle. Chuti chung chung chuan theatre inhawng ang chhun chhunah chuan movie show a ni ṭan tawh a, chung movie pek chhuah zingah chuan The Tax Collector-in sum a lalut tam ber a, The Rental chu pahnihna ni ve thungin Peninsula chu pathumna a ni. Top 10-a lang chin pawh hian sum an la lalut tlem hlawm hle a ni.

The Tax Collector hi sum lalut tam ber ni mah se $309,694 chiah a lalut a, theatre 129-ah chiah chhuah a ni bawk. Hri len loh lai kha chuan theatre 4000 chuangah film hi an pe chhuak tlangpui a, tunah erawh hri a len miau avangin film tlangzarh tharte pawhin sum an lalut tam lo a, film industry hi hripui vanga sum hloh hnem ber zingah an tel tih a chiang hle.

The Tax Collector hi action thriller film a ni a, film star lar tak tak inlanin chung zingah chuan Shia LaBeouf leh Lana Parrilla-te pawh an tel. An film siamna budget hi $maktaduai 30 lai a ni a, an budget hi an la tlin lo nasa hle a ni. Theatre inhawn pangngai hunlai chu nise film hit ber pawl tura rin a ni bawk.

Zirtawpni liam ta khan US-ah tlangzarh a ni a, khawvel hmundangah erawh tlangzarh a la nih ve loh avangin US-a a sum hailuh bak hi ram dang Box Office aṭangin sum a lalut lo a ni. US Box Office-ah No.1 ni mah se critics lam fak erawh a hlawh vak lo a, review-tu ho pawhin ratings an pe sang lem lo hle.

Chart hmasaa sum lalut tam ber The Rental chu pahnihna a ni a, theatre 178-ah chhuah a ni thung a, heti chung hian The Tax Collector a ngam ta lo.

Peninsula hi South Korean film niin kum 2016-a tlangzarh hit tak mai Train to Busan chhunzawmna kha a ni. US-ah chuan Zirtawpni liam ta khan tlangzarh a ni a, theatre 48 lekah chhuah niin $118,647 a lalut. SKorea-ah chuan July 15 khan tlangzarh a ni daih tawh a, khawvel puma a sum hailuh chu $28,754,940 lai a ni tawh thung a, hripui leng kara film tlangzarh sum lalut tam pawl tak pawh a ni.

Theatre tam ber khar a ni chungin film tlangzarh thar erawh a awm chho ve ta zel a, film thar Made in Italy chu pangana a ni a, The Burnt Orange Heresy chu parukna niin Juvenile Delinquents chu pasarihna a ni bawk. Juvenile Delinquents hi thratre paliah chiah chhuah a ni nghe nghe.

1    The Tax Collector    $ 309,694

2    The Rental    $ 123,744

3    Peninsula    $ 118,647

4    The Big Ugly    $ 71,690

5    Made in Italy    $ 33,998    

6    The Burnt Orange Heresy    $ 26,173

7    Juvenile Delinquents    $ 11,605

8    The Grizzlies    $ 1,610    

9    What We Found    $ 1,528

10    Killer Raccoons 2:     $ 1,236    

    Dark Christmas in the Dark