Zirtawpniah Miley Cyrus hla thar

Miley Cyrus chuan Zirtawpni hian a single thar 'Midnight Sky' a tlangzarh dawn.

Kar hmasa khan hemi chungchang hi a twitter-ah tarlangin Miley fan-te tan chuan a phurawm tawh hle ang. Kumin hian hla tihchhuah a la nei lo a, 'Midnight Sky' hi kumina a hla tihchhuah hmasa ber tur a ni dawn.

Nikum lamah kha chuan hla tihchhuah a nei ve nual a, chung zingah chuan Ariana Grande leh Lana Del Rey-te nena an tihchhuah 'Charlie's Angels' track 'Don't Call Me Angel' pawh kha a tel. Miley hian kar hmasaah tho khan Dua Lipa nen an thawk dun mai thei tih a lo sawi tawh bawk a, an thawkdun dawn ti chiah lo mah se post a siam dan vel aṭang chuan an thawhdun hmel hle. Dua Lipa leh Miley Cyrus-te hian social media lamah an thlalak dun an tarlang nual a ni.

Kum 27 mi 'The Climb' hitmaker hian June thlaah khan thla ruk chhung chu zu leh ruihhlo tel loin hun a hmang tih a lo sawi tawh a, a ṭhiante pawhin hemi vang hian Cody Simpson nen an inkar pawh a ṭha sawt hle niin an lo sawi tawh bawk.

Miley chuan hetianga, ruihhlo tel loa hun hman chhunzawm zel hi a tum tih sawiin, nundan hrisel zawnga nun zel a duh a ni. Entertainment Tonight-in an thudawn an tarlan dan chuan Miley chu a ruihhlo nghei vangin Simpson nen an inkar pawh a ṭha hle a, ruihhlo nghei tura thutlukna a siam chuan nundan chungchanga a ngaihdan pawh a thlak nasa hle. Nun dan thara nun chu nuam a ti a, chhunzawm zel pawh a duh niin an tarlang.