Album cover 250 chuang thla latu hnenah MPA Icon Award hlan

Abbey Road Studios Music Photography Awards (MPA) ceremony-ah album cover 250 chuang zet thla laksaktu, legendary music photographer Henry Diltz chu Icon Award hlan a ni.

Kum 84 mi ni tawh, Diltz hi 1969, 1994 leh 1999-ah Woodstock official photographer pawh lo ni tawhin, Life Magazine-ah a thlalakte pholan a ni. Heti chung hian a hna chu a vanneih vang niin a sawi a, "Photo school-ah ka kal ngai lo a, kal pawh ka ngaihtuah ngai lo. Ka ṭhian musician-te ho nen inkawmin, thla ka la ṭhin," tiin a sawi. Amah hi musician a ni bawk a, thla a lak loh lai chuan a musician ṭhian ṭhenkhatte puiin, backup vocal leh banjo part-te a lo play ve ṭhin.

Diltz hian music album cover 250 chuang thla a lak bakah, 1960 leh 1970 chho khan publicity shot sang chuangah a kutchhuak hmuh tur a awm. Doors 'Morrison Hotel' cover thla a laksak te, Paul leh Linda McCartney thla a laksakte chu April, 1971 kha Life cover-ah hman a ni. Neil Young, Crosby Stills & Nash, Jackson Browne, Joni Mitchell, The Monkees-te album cover thla pawh a lo laksak tawh bawk.

Grammy Awards, Lucie Awards leh International Photography Hall Of Fame-ahte Diltz hi a hmain chawimawina hlan a lo ni tawh bawk a ni.