Single chart-ah David Bowie hla a rawn lang

Kum 20 chuang fe hnuah David Bowie hla chu Billboard single chart-ah top 40-ah a rawn lang ve leh.

David Bowie thihna hian khawvel a nghawr hle a, chu mi piah lamah, a music te nasa takin hralh a kal leh. A album hnuhnung ber, Blackstar-a mi, Lazarus hla chu Billboard Hot 100-a 40-naah a rawn lang thar. David Bowie-a hla, US top chart-a top 40-a lang thei hnuhnung ber chu 'Never let me down' hla kha a ni a, kum 1987 khan 28-ah a lang a ni. Lazarus hi Bowie-a hla, top 40 china lang thei 14-na a ni.

Rock Songs chart lamah chuan Lazarus hi a thleng sang hle a, pathumnaah a awm. Palinaah Space Oddity awmin, Under Pressure chu panganaah a awm bawk. Bowie-a album hnuhnung ber Blackstar hi Billboard album chart-ah pakhatnaah a awm a, Billboard chart-a pakhatna hauh thei a album hmasa ber a ni.