Bihar-in hmeichhiate tan hna 35% a dah dawn

Bihar sorkar chuan state chhunga sorkar department zawng zawnga hna lakna tura hmeichhiate puala 35% dah rawtna chu Thawhlehni khan a pawm.

Chief Minister Nitish Kumar-a hoin cabinet meeting hi neih a ni a,thutlukna hi an siam nghal a ni. Cabinet chuan Extremely Backward Classes (EBC) hmeichhiate tana 3% dahsak ṭhin pawh chhunzawm zel a remti. Nikuma state assembly inthlan neih tur atana a campaign-naah khan Nitish Kumar hian a party, JDU leh RJD leh Congress
ṭangrual pawl, Grand Alliance-in sorkarna a siam thei a nih chuan hmeichhiate puala sorkar hna lak tura 35% dah sak hi a lo tiam tawh a ni.

Kum 2015, November thlaa CM atana lakluh a nih hnu lawkah, Nitish Kumar chuan a thu lo tiam tawh tipuitling tur hian hma a lak nghal tur thu a sawi.

Kumar chuan state sorkarin police constable leh sub-inspector tur laknaah hmeichhiate tan hian 35% a lo dah sak tawh thu a sawi a, Panchayati Raj system leh primary school zirtirtu laknaah pawh hmeichhiate tan hian 50% hauhsak a ni bawk tih a sawi.

Chief Minister Kumar hian kum 2005-a CM term khatna tura lakluh a nih hnu khan school aṭanga hmeichhe zirlai bang tihtlem a nih theina turin hmeichhe zirlaite hnenah bicycle leh uniform a thlawna semna tur scheme pawh a lo siam tawh a ni.

He scheme avang hian a bikin thingtlang bialah zirlai hmeichhia inziaklut an pun phah hle. Bihar assembly inthlan neih zawh takah khan mipa aiin hmeichhe voter an tam zawk a, hei vang hian party-te tan hmeichhiate vote hui theih hi a hlu hle. Nitish Kumar-a kaihhruai hian hmeichhiate vote hi a hmu ṭha hle.