Racism in Oscars? Host Chris Rock inhnukdawk turin an nawr

Oscars-a chi inthliarna chungchang chu an la sawi tawp thei lo a, host tur hi Chris Rock, midum an a, inhnukdawk turin an nawr nasa hle.

Chris Rock hian kum 2005 aṭang khan Oscar hi a host tawh ṭhin a, kumina hetia sawiselna a lansarh takah hian mi tam tak chuan inhnukdawk a, Oscar hi boycott ve turin an nawr mek. Oscar-a actor nominate mi 20 zing≠ah hian midum emaw, Hispanic emaw, Asian emaw an lang miah lo a, hei hi an sawisel nasa hle a ni.

Inhnukdawk tur leh boycott tura nawrtu langsar zingah hian Furious 7-a mi, Tyrese Gibson te, rapper 50 Cent te pawh an tel. Tyrese Gibson chuan, a duh loh dan lan chhuahtirna ṭha ber chu Oscar host luih hram a ni lo a, boycott hi a ni zawk tih sawiin, hei hi Chris Rock-a thil tih theih ropui tak ni tur angin a sawi. 50 Cent pawhin, "Chris, khawngaih takin Oscars awards hi host lo hram teh," tiin a ziak.

Oscar nomination sawiseltu langsar tak, director Spike Lee chuan Chris Rock hi a thlawp thung. "A thil tih duh ang a ti dawn a, chutah chuan kei chuan thiam loh ka chantir lo a, ama thutlukna siam hi ka thlawp tlat ang," a ti. Whoopi Goldberg ngaihdan pawh a danglam hret; "Chris Rock chuan Academy Awards a host dawn a, hemi lo boycott chiam hi mitena an thil duh loh anga ṭha lo tho a ni," a ti. Goldberg chuan miin an duh loh movie chu an boycott mai tur a ni a, award ceremony erawh chu boycott tur a ni lo tiin a sawi bawk.