Filmstar-te hna hmasa Bollywood star-ten eng nge an tih ṭhin?

Mi tam tak chuan hlawhtlin nghal kan tum a, hna ṭha leh zahawm, sum tam tak hailuh nghal theihna hmuh kan tum ṭhin. Hetiang nei nghal a, chang nghal thei hi chu mi vannei tlem te an ni. India huap pawha mi lar leh hlawhtling, mi tam takin pathian biaka an biak loh chauhte pawh hi an hna hmasa, an lo thawh ṭhin chu a ho ang reng ve ṭhin hle.

Sri Lanka aṭanga Bollywood khawvela hlawhtlinna rawn chang ta, Jacqueline Fernandez pawh hi a larin a hlawhtling nghal em em lo. Sri Lanka-ah a hma chuan TV reporter a ni ṭhin a, a bikin politic chanchin thar a umzui ṭhin. Smita Patil hi chuan TV lam a luhchilh hma ang reng a, Doordarshan-ah a thawk ṭhin.

Mi tam takin an star rawn an hmuh nin loh, Sunny Leone hi a lan ang ngawt a ni lo a, hmeichhe pangngai tak a ni. A hma chuan German bakery-ah a inhlawh ve lawp lawp ṭhin a, chumi hnuah acting lamah a lut chho a, tunah chuan a hlawhtling hle tawh a ni. Soha Ali Khan erawh hi chu a chawr chhuahna a fuh ang reng. Khawvel huap pawha zirna
ṭha ber pawl, London school of Economics aṭangin Master Degree a zo a, hemi hnu hian Ford Foundation-ah a thawk a, Citibank lamah a thawk leh a, tichuan film industry a luhchilh ta thung.

Bollywood film-a pa lema chang thiam zet mai, Bomani Irani hi a hlawhtling nghal mai bik lo a, Mumbai-a five star hotel-ah waiter-in a inhlawh ve ṭauh ṭauh ṭhin. Chumi hnu chuan Mumbai chhim lama an chhungkaw eizawnna, bakery dawrah a nu a pui leh a ni.

Amitabh Bachchan tluka hlawhtling hi an tam lo mai thei a, mahse a lo hlawhchham ve fo tawh ṭhin. All India Radio-a announcer nih a tum ve hle ṭhin a, mahse an duh lo. A hnuah shipping firm-ah executive-in a thawk ṭhin a, Bollywood-ah a lut chho a, a hlawhtling ta em em a ni.

John Abraham hi media lama a lut phawt a, a thawhna firm an tihtawp leh tak avangin hna nei loin a awm ren rawn a; Media Planner, Mumbai-ah a thawk leh a, chuta ṭang chuan modelling industry-ah luh chhohna remchang a hmu ta a ni. Akshay Kumar pawh hi Bangkok-ah eisiam (chef) a ni ṭhin a, chuta ṭang chuan Mumbai-ah a insuan thla a, martial art zirna a hawng leh a, chuta ṭang chuan film industry-ah a lut chho ta a ni.