Dream Theater album thar tur The Astonishing

January 29 hian progressive metal-a band ropui berte zinga mi, Dream Theatre chuan an album roh leh ropui tur an tichhuak dawn a, an album thar tur hming hi The Astonishing a ni. Hla satliah a ni dawn lo a, he album hi thawnthu ngaihnawm tak, fiction thawnthu khawvela mi a ni dawn.

Dream Theater album 13-na tur The Astonishing hiPetrucci leh an keyboardist Jordan Rudess te phuah a ni a, tun aṭanga kum 300 vel, khawvel future behchhan a ni. Khawvelah khawtlang inawpna felfai leh mumal a awm lo a, chutiang khawvelah chuan Nafaryus chuan ro a rel a, chu khawvelah chuan mihring tumah mai hian music thar an siam tawh lo. Music thar awm tawh lohna khawvelah chuan khawl thawm bengchheng tak takin hmun a chang tawh zawk thung. Lo neitu chhungkua aṭanga rawn chawr chhuak Gabriel chuan harsatna karah music a rawn tharthawh leh chanchin a ni.

The Astonishing hi double album a ni dawn a, multicharacter story niin, act pahnihah ṭhen a ni ang. Dream Theater-a an guitarist, a dintu ni bawk John Petrucci hi science fiction-ah a tui hle a, Games of Thrones te, Star Wars te, Lord of the Rings te a ngainat ber ber an ni. He album hi concept album an tih ang kha a ni a, album chhunga hla awm zawng zawng hian thawnthu pakhat a hawi vek dawn. Concept album chhuak tawh zingah chuan ropui tura ngaih a ni a, Nightwish concept album, Imaginaerum pawh kha a hit hle a, movie pawhin a hlawhtling ang reng viau. Dream Theater concept album tur hi movie-in an siam ve nghal ang em tih erawh a hriat rih loh.