GMA Dove Awards host tur Tauren Wells

Gospel Music Association chuan 54th Annual GMA Dove Awards host turin Tauren Wells ruat a nih thu a puang.

GMA Dove Awards Contemporary Christian Artist of the Year leh 2018-a New Artist of the Year award dawngtu, Tauren Wells hian award ceremony hi a host bakah, a perform nghal bawk ang.

54th Annual GMA Dove Awards hi October 17 hian Allen Arena, Nashville-ah sem a ni dawn a, live show neihna tura ticket hi chu sold-out a ni tawh.

Tauren Wells hi platinum-selling musician, preacher leh public speaker niin, GMA Dove Awards pariat dawng tawhin, Grammy-ah nomination 10 bakah Billboard Music Award nomination-ah pawh a lo lang tawh a ni. Gospel music chart-ah no. 1 ni thei hla paruk neiin, video view mtd 330 leh global stream tld 1.1 chuang a nei tawh bawk.

Kumina GMA Dove Awards theme atan hian Isaia 42:12 "Lalpa chu tiropui sela, thliarkarahte chuan a fakna thu hril rawh se," behchhanin 'Joyful Echo' tih hman a ni.

Wells chuan host tura thlan a ni chu a phur hle tih sawiin, "Christian leh gospel music pual hun ropui tak, GMA Dove Awards ka host tur hi ka phurin ka tan chawimawina ropui tak a ni. 'Joyful Echo' tih hian chhuan zawng zawngin Pathian ropuizia an puan tur thu hi min ngaihtuahtir a ni. Pathian ṭhatzia hi chhuan tinah an hril zel ang," a ti.

Kumina Dove Awards sem turah hian Brandon Lake chu nomination hmu hnem ber niin, caterogy 11-ah nominee a ni a, heng zingah hian artist of the year pawh a tel. Nomination hmu hnem zual dangte chu nods pariat hmutu Jeff Pardo bakah, nods paruk ve ve hmutu Jason Ingram leh Kirk Franklin-te an ni. Katy Nichole chuan nomination pali hmuin hmeichhe zingah a hmu hnem ber a, nod pathum hmu Lauren Daigle, Naomi Raine leh Tasha Cobbs Leonard-te'n an dawt a ni.