James Bond theme song sa turin Harry Styles duh ber

James Bond film thara theme song sa tura zaithiam an duh an thlan zingah, British singer Harry Styles duhtu an tam ber.

James Bond film thar tur hi sawi thawm a awm leh tak avangin, a theme song sa tur zaithiam an duh pawh an lo thlang leh hman tawh a ni. Zaithiam an thlan zinga a sang pathumte chu British vek niin, Harry Styles bakah Ed Sheeran leh Lewis Capaldi-te an lang. One Direction star hlui hi theme song sa tur hian thlan a ni dawn em tih erawh a chiang chuang lo.

Daniel Craig-a'n 007 nih chhunzawm a tum tawh loh thu a sawi hnuah, James Bond role chang tur pawh hi hming hrang hrang sawi lan a awm. Idris Elba, Tom Hardy, Henry Cavill, Tom Holland, leh Aaron Taylor-Johnson-te chu an sawi langsar deuhte an ni.