Khiangte Construction Ṭhazual Lengzem: Pakhatna hauhtu David Darlong 'Lo kir hram rawh'

Mizo Idol 2022 intihsiakna aṭanga Zoram mipuite hriat hlawh, a zaithiam avanga mi tam takin an ṭan em em, David Darlong chuan Ṭhazual Lengzem chart thar berah 'Lo kir hram rawh' tih chu pakhatna a rawn nihpui ta.

David Darlong hi Idol intihsiakna zawh hnuah pawh a lar chho zel a, boruak a nei lian thei hle. A zaithiam bawk a, a hla hrang hrangte Ṭhazual chart-ah vawi tam tak a lo lanpui tawh hlawm a ni. 'Lo kir hram rawh' tih hi H&D hla niin, David Darlong hian Mizo ṭawnga sak turin a letling a ni. Music & recording hi Tluanga Hnamte, Westend Studio kutchhuak niin, a backing vocal-te hi Aengi leh Rosalyn an ni a, director JonMizo Visuals a ni. July 23-ah he hla hi YouTube lamah a dah chhuak a ni.

'Thaibawih' film a hit bawk a, Saka chuan a OST, 'Hmaikawr' chu pahnihnaah a rawn invawrh chhuahpui bawk. Ṭhalaite duh rawn, Siampuii Ralte pawh a thawm a ring chho zel a, J&J hla a cover 'Nang ngei hi' chu pathumnaah a rawn lanpui.

Manuna pawhin hma rawn sawn zelin, 'Ka ta I ni' chu palinaah a rawn chho a, Mizo Idol 2022 T. Vanlalhmangaihi'n intihsiakna zawh hnuaa music video a siam hmasak ber, 'Friendzone' chuan Top 5 a rawn khar.

Ṭhazual Lengzem Top 10-ah hian Eddie Pachuau leh R. Laithangpuii-te pawh an la lang zel. Anni bakah mi pathum - Vuli Pachuau, Chama Thangluah leh Kimkimi-te chu chart-ah an rawn lang thar bawk a ni.