Mizo Film Award 2023-a perform turte a chiang ta

Mizo Film Award 2023 chu September 29 zan hian sem a ni dawn ta a, Award sem zana perform turte pawh a chiang ta.

Zirtawnni zana Vanapa Hall-a Award semnaah hian Mizo artist kan neih ṭhat ber berte an perform dawn a, an zingah a zaithiam piah lama a che vel hmuhnawm tak mai, Zaii Hauchhum pawh a tel. 'Ka U Liana' film OST 'Ka Chelh Ngam lo che' satu, Zaii perform bon tak kan hmu leh ngei dawn e.

Mipate star rawn, tunlai zaithiam zinga sawm hlawh tak Siampuii Ralte pawh a zai dawn. Sihphir nula Siampui Ralte hian MiMi OST 'Ka Hmangaih Ber Che' tih hla kha thiam takin a sa a, he hla hmang hian kal khawm mipui a awi dawn a ni.

Zaithiam leh lemchan thiam ni bawk, 'Ka U Liana' film-a chang thiam zet mai Vanlalhmangaiha ngei mai kha a zai dawn bawk - a aw ṭhat zia leh zaithiam zia sawi nawn a ngai lo. Best OST award dawng thei tura chhawp chhuah zinga mi JH Peka leh Deborah te an la awm cheu a, Young Fella beisei a ni bawk.

Zai bakah hian lam hmuhnawm tak en tur a awm dawn a, jump rope a thiam avanga hriat hlawh C. Lalruatdiki (Diktei) a inlan dawn a, Mama Hnamte nen an perform dun dawn a ni. Mizo Film Award sem zan hian tun hnaia Mizo film star boralte sunna hun hman a nih dawn bakah, piracy duh loh zia lantirna hun hman a ni ang.

A hmunah mi tam zawkin an chhim theih nan ticket siam a ni a, Rs. 100/- man niin ZALEN Office, Treasury Square leh TT Arts, Zarkawtah te lei theih a ni.