Box Office: 'Expand4bles' in 'The Nun II' a ngam lo

North America box office-ah film thar, Sylvester Stallone leh Jason Statham channa "Expend4bles"-in beisei a pha lo hle a, 'The Nun II' um pha loin tlangzarh karah no. 2-ah a lang thei hram.

Action thriller hian series hmasa ho a pha lo hle a, tlangzarh karah USD mtd 15-17 la lut tura chhut a nih laiin, domestic-ah USD mtd 8.3 chiah a la lut thei. A series hmasa hoah,"The Expendables 3" khan tlangzarh karah USD 15.8 la lutin, "The Expendables 2"-in USD mtd 28.5 leh 2010 original "The Expendables" khan USD tld 34.8 an la lut thei a ni. Foursequel siamna atan hian USD mtd 100 zet sen a ni a, Stallone leh Statham bakah Lundgren, Randy Couture, Megan Fox, 50 Cent, Tony Jaa, Iko Uwais, Jacob Scipio, Levy Tran bakah Andy Graci-te inlan mah se an chet ṭhatpui zo meuh lo a ni.

Supernatural sequeal, 'The Nun II' chuan USD mtd 8.4 lak luh belhin, kar thum chhung no. 1-ah a awm thei ta. Hemi rual hian "Expend4bles" nena an inthlauhna erawh a tam lo hle. USD mtd 5.6 la luttu, 'A Haunting in Venice' chu no. 3-ah a tla thla thung. Top 5-ah hian 'The Equalizer 3' leh 'Barbie' te an la lang bawk.

Kar liam ta kha kum 2022, December 9 hnu lama kar tawpa film hrang hrangte sum lak luh tlem ber kar a ni tih Comscore-a social media analyst, Dergarabedian chuan a sawi. Kumin February 10 hnua kar tawpa eng film mahin USD mtd 10 an lak luh phak lo ṭum khatna a ni bawk.

Dergarabedian chuan mipuite ngaihven, "Taylor Swift: The Eras Tour" concert film, "The Exorcist: Believer" leh "Saw X"-te a chhuah hunah box office boruak pawh a rawn kang chho lehin, a rawn pangngai leh thei dawn niin a sawi.