SRK 'Jawan' in ni 18 chhungin Rs. vbc 1,000 la lut

Bollywood superstar, Shah Rukh Khan film thar, 'Jawan' chu a che ṭha chhunzawm zel a, tlangzarh a nih aṭanga ni 18-na, Pathianni khan khawvel pumah Rs vbc 1,000 a la lut tling ta.

'Jawan' hi Bollywood film zingah Rs vbc 1,000 la lut thei parukna a ni ta. SRK hi Indian actor zingah Rs vbc 1,000 lalut thei film pahnih nei awm chhun a ni a , a film dang, 'Patthan' chuan Rs vbc 1,000 chuang a lo la lut tawh bawk.

Bollywood film zingah, kum 2016-a chhuak, Aamir Khan channa 'Dangal' chu sum la lut hnem bera sawi niin, Rs vbc 2,000 chuang a la lut pha niin report chuan an tarlang. Baahubali 2 – The Conclusion (2017) khan rawn dawtin, Rs vbc 1,747 a la lut thei bawk.

'Jawan' hi Red Chillies Entertainment-ah tihchhuah niin, director Atlee a nia, Gauri Khan produce a ni. Action-drama-ah hian Nayanthara leh Vijay Sethupathi bakah Deepika Padukone pawh changin, September 7 khan ṭawng chi thum - Hindi, Tamil leh Telugu te'n tihchhuah a ni.