Carlton Dixon-a'n Virgin-in nupui a nei

American Idol aṭanga khawvelin a hriat lar, Carlton Dixon chuan January 8 khan Tennessee-ah nupui a nei a, virgin-in nupui a nei.

A hairstyle aṭang ringawt chuan mi pawlawh ve hmel tak a ni na a, sam khuihpial tak takte pawh an insum hleih theih lohna sex-ah Carlton Dixon hi a insum thei a, Kristian ṭha a nihna a lantir a ni. A bialnu, Annie Coggeshall nen Tennessee-a Nashville khawpuiah an innei a, an inneih hnu lawkah Carlton hian a nupui nen hian an inngaihzawn laiin sex an hmang miah lo tih a sawi chhuak.

Carlton chuan, "Kan inneih hmaa kan zin dun reng rengin hotel-ah room khatah kan thleng ngai lo a, room hran ve ve kan la thlap zel. Mipat hmeichhiatna hman kawngah hian inneih hma chu fihlim kan tum tlat a ni," a ti.

"Sex hi inneihna huang chhungah chauh hman tura Pathianin a siam a ni tih ka ring tlat a, chumi hun nghah chu thil ropui tak niin ka hria," a ti. "Hetianga zirtirna hnuaiah hian ka seilian a, chu chu thil dik ni ngeiin ka hria a, Bible pawhin min pui a ni," a ti bawk. A nupui Coggeshall pawhin, "Kan thil tih leh kan inserhna hi ka thinlung takin thil dik tak niin ka hria a, kan thil tih leh kan insumnaah te kan lawm em em. Kan inneihnaah Pathian a awm a, Pathian kuta kan innei ngei tih kan hre chiang em em a ni," a ti.