2015 AD Khawvela Bike man to ber

ABC-in kum 2015 chhunga bike man to ber a tar chhuak a, a man to ber hi keini India chÍng chuan man tam tak a ni ang. Anni pawisa pawhin maktaduai a tling tlat.

American Broadcasting Company-in bike man to ber a tar chhuah a, a chung ber luahtu chu Ecosse ES1 Superbike a ni a, a hmanrua a ṭha a, a khawl a ṭha. V4, four stroke a ni a, a power pawh 200 hp a ni a, 189.84 nm a ni. A tlan chak theih tawpin tlan ta se, darkar khatah km 370.1 a chakin a tlan thei. A hnung leh hmaa torsion bar hi carbon fibre-a siam a ni. A man hi USD mtd 3.6 zet a ni.

Harley-Davidson kutchhuak, Cosmic Starship hi man to ber dawttuah a tar chhuak. Harley-Davidson kutchhuak reng reng hi khawvela bike man to ber pawl an ni zel a, Cosmic Starship pawh hi USD mtd 1 man zet a ni.

Dodge Tomahawk V10 Superbike hi a pian a danglam a, a khalh pawh hi a nuam phianin a rinawm. USD 555,000 man a ni. Viper V10 based a ni a, a horsepower hi 500 zet niin, ke pali a nei! Top speed hi 400 mph a ni.

Yamaha Roadstar BMS Chopper hi a pian dan aṭanga en mai chuan kaikuang te pawh a ang lek lek zawk. A engine hi 1700 cc a ni a, khawvela bike chak leh ṭha ber zinga mi a ni a, a man tam lamah pawh ABC-in list a tihchhuahah hian palinaah a awm pha; a man hi USD nuai 5 a ni. Ecosse Titanium Series hi USD nuai 3 man a ni a, a horse power hi 225 a ni.

Bike man to zingah hian Ducati Desmosedici D16rr NCR M16 (USD 232,500) te, Ducati Testa Stretta NCR Macchia Nera Concept (USD 225,000) te, Suzuki AEM Carbon Fiber Hayabusa (USD 200,000), MTT Turbine Streetfighter (USD 175,000) leh Icon Sheene (USD 172,000) te top 10-ah an lang.