Pensy-i hla thar kan hmu thei ta

Kum 2015 chhunga Zonet Ṭhazual Fakna chart-a thlan hlawh berte zinga mi leh, chart-a pakhatna hauh ngun berte zinga mi Pensy chuan Thawhlehni zan khan a music video thar chu TV-ah a tihchhuahtir ta.

Pensy B. Lalthangliani music video thar hi 'Chelh ding rawh' tih a ni a, kum 2016 chhunga a music video hmasa ber a ni. He hla phuahtu hi R. Lalchhanhima (Chhantea), Khumtung a ni a, a album hmahruai a ni ber mai. Chhantea Hlate (Mizo Female Singers) music video album siamin hma lak chhoh mek zel a ni a, chumi atan chuan tuna Pensy hla thar hi a khuhhawnna angah a ngaih theih ang. He album thar tur recording leh shooting buaipui chhoh mek a ni a, zaithiam lar tak takte an zai ang; kumina tihchhuah hman tura ruahman a ni.

'Chelh ding rawh' hla hi sikul kalho ṭhin ṭhianho, zirna avanga inṭhendarh hun a lo thlena lunglenna leh inṭhendarh uizia, hun pawh chelh ding hram tura duhna hla a ni. Music video-ah hian Miss Chapchar Kut 2015, Khumtung nula, H. Vanlalhlimpuii a inlan. A music hi Kima Chhangte leh C. Lalzarmawia te kutchhuak a ni a, video hi RDS-in an buaipui thung.