Adele 'Hello'-in record a siam

Adele single hit 'Hello' chuan record a rawn siam thar leh a, chu chu YouTube-a entu mi tluklehdingawn nei chak ber a ni. Tunah hian YouTube-ah he video hian entu tluklehdingawn khat a nei tawh.

YouTube-a video awm tawh zingah Psy-a hla hit 'Gangnam Style' kha entu tluklehdingawn khat nei tling hma ber a ni ṭhin a, mahse Adele a rawn lan chinah chuan Psy pawh a tawlh rawk rawk mai.

Nikum October thlaa 'Hello' tih hla a tihchhuah aṭangin record a rawn siam nghal mawp mawp a ni ber. Taylor Swift-in a hmaa record a rawn siam tawh chu a rawn khum nghal a, darkar 24 chhunga video ngah ber niin, darkar 24 chhungin entu maktaduai 27 a nei hman. Video ni lo, digital-a November thlaa he hla a zawrh chhuah
aṭangin kar khat chhunga download nasat ber hla a ni leh a, kar khat chhung≠in mi maktaduai 1.1 ten an download.

November thla khan a album 25 a tichhuak a, digital album download nasat ber a rawn ni leh a, hei mai ni loin kar khat chu album hralh chhuah hnem ber a ni bawk. 25 album a zawrh chhuah kar khat chhung lekin copy maktaduai 3.38 zet a hralh chhuak thei a, a hmaa record lo siamtu NSYNC te a rawn khum.

'Hello' video hi YouTube-ah ni 87 chhung≠in entu tluklehdingawn khat an tling hman. Psy-a hla hit 'Gangnam style' khan entu tluklehding≠awn khat tlin nan ni 158 a mamawh a ni. YouTube-a video entu tluklehdingawn khat tling khawp music video hi a la tam lo hle. Psy-a Gangnam Style bakah, Justin Bieber-a 'Baby' te, Maroon 5 'Sugar', Major Lazer 'Lean on' te, OneRepublic 'Counting Stars', LMFAO 'Party Rock' leh Sia 'Chandelier' te deuh chauh an la ni. Hengho hian entu tluklehdingawn khat nei tling tur hian a kuma kum tel hun an mamawh.