manuna 'Happy Birthday'

'Hard Ray aṭanga kan hriatlar leh rawn hlawhtling, Manuna chuan music video thar a buaipui mek a, kar lehah te khi chuan kan hmu hman tawh mai thei.

Manuna hla thar tur hi piancham lawmna, 'Happy Birthday' a ni a, an ṭhiannu pian champha phak lawmpui nana a phuah a ni. "Kan buaipui mek a, a mixing vel kan la zo lo a, kan zawh thuai ka ring. Kan tichhuak thei ṭep ang," tiin Manuna chuan a sawi. Manuna hian hla a phuah nual tawh a, hla ṭha tak tak a nei tawh a, sak mai theih tur pawh a nei nual.

'Happy Birthday' hla hi ama phuah a ni a, Hard Ray-a an guitarist, Malsawma recording studio-a a buaipui a ni ber. Malsawma hian Princeton Records a nei a, hetah hian a track an siam bakah an record nghal a ni. Video hi Mapuia, Bawngkawn kutchhuak a ni dawn a, ani hi Bawngkawn Chhim Veng KṬP film lo siamsaktu kha a ni.

Hard Ray hi an kehdarh nge, an chawl tawh tih zawhnaah Manuna chuan,"Kan la kehdarh lo a, music pawh chawlhsan kan la tum lo," a ti. "Amaherawhchu nupui fanau nei tawh an ni deuh vek a, keimah hi tlangval awm chhun ka ni tawh mai a, thil tih khawm emaw, han awmkhawm a harsa tawh hle a ni," a ti. Engtikah emaw chuan tihho leh ngei chu an la tum tih sawiin, hunthawl an neih hunte an thlir ang a, eng emaw thil thar chu tihchhuah leh ngei an tum niin a sawi.

Manuna hian kuminah music khawvela hnuhma thar tam zawk hnutchhiah a tum a, a inruahman mek. "Kumin hian a theih anga tam music video pawh tihchhuah ka tum ang. A tlem berah tuna mi tiam loin pahnih dang hi chu tihchhuah leh ngei ka tum a, ka hun neih dan azir a ni ang," a ti. Ṭhazual Lengzem chart-ah Manuna hla 'A riang tawna'n' tih chu pakuanaah a lang mek a, he hla hian pakhatna pawh a lo hauh tawh a ni.