Boruak tichhetu lian India

India-ina boruak chhia a tihchhuah hi kum 2000 aiin a let deuh thawin a tam tawh zawk. India hian Biennial Update Report (BUR) chu a vawi khatna atan United Nations Framework Convention on Climate Change (UNFCC)-ah a theh lut a, hetah hian India-in boruak chhia a tihchhuah hi kum 2000 aiin 40% ngawtin a tam tawh zawk.

He report hi Union Ministry of Environment, Forest and Climate Change-in NATCOM hnuaia a siam a ni. India-in boruak chhia a tihchhuah te hi CO2, Methane, Nitrous Oxide, Hydroflourocarbons, Perflourocarbons leh Sulfur Hexaflouride te a ni.

BUR-in a tihchhuah aṭanga a landanin, India-a boruak chhia tihchhuah a pun nasatna chhan chu electric siam chhuah tam tial tial vang te, transport leh energy sector-in hma a sawn vangte a ni a, India-in boruak chhia a tihchhuah za zela 72 hi heng sector aṭanga chhuak a ni. Agricultural process hian za zela 18 a thawh a, Industrial process-ah za zela 8 niin, waste sector-in za zela pathum a thawh.

UNFCC hian ramṭhanglai te chu kum khat danah an ram dinhmun tarlanna an hnena thehlut ziah turin a hriattir a, hei hian hma lak dan turah ruahmanna ṭha zawk siam a awlsam phah rin a ni. Khawvelah hian boruak chhia tichhuak hnem ber chu USA a ni a, a dawtah China niin, European Union chu pathumna a ni. UNFCC-ah hian India bakah ram dang 23 ten an ram dinhmun an thehlut a, heng zingah hian Brazil pawh a tel.