WGA-in nawrh an titawp ta

Hollywood screenwriter intel khawm, Writers Guild of America (WGA) chuan Alliance of Motion Picture and Television Producers (AMPTP) nena inremna an siam theih loh avanga thla nga dawn nawrh an huaihawt chu Nilaini aṭang khan an titawp ta.

WGA hian hlawh tihsan phut leh artificial intelligence (AI) hman a nih chungchangah lungawi loin, May 2 aṭang khan nawrh an huaihawt a ni. July 13 khan Screen Actors Guild (SAG) chuan an nawrh hi an zawm ve leh a, Hollywood a nghawng na hle. Milken Institute economist Kevin Klowden chuan WGA leh SAG-te nawrh avang hian US-in USD tld 5 vel a hloh hman niin a sawi.

Writer leh actor-te nawrh avang hian film siam tur tam tak a khaihlak phah a, TV show-te tihtawp a ni bawk. WGA leh AMPTP hi inrem tumin ṭum eng emaw zat an inbe hman a ni. Kar liam ta khan ni nga chhung an inbiak hnuah kum thum daih tur inremna, three-year deal an siam a, hei hi WGA board pawhin pawmin, nawrh huaihawt hi tihtawp a ni ta a ni. WGA member 11,500-te chuan October 2-9 chhung hian vote an la ve leh dawn a, mahse, hemi hma hian board chuan nawrh tihtawp phawt hi a rel a ni.

Kum thum atana inremna an siamah hian writer-te hlawh tihsan, health leh pension pek, contract pawhsei bakah streaming lama viewer neih dan azira bonus pekte a tel. Hei bakah AI hman tur chungchangah pawh point fel tak siam a ni bawk.

WGA leh AMPTP-te'n inremna an siam theih tak avangin actor-te pawhin inremna siam tura inbiakna neih chhunzawm thuai an inpeih thu an sawi nghal bawk a ni.