Mizo Film Award 2023 sem a ni dawn ta

Entertainment Society of Mizoram (ESM) buatsaih, Mizo Film Award 2023 chu zanin hian sem a ni dawn ta.

Kum 2021 khan Tlau Entertainment buatsaihin Mizo Film Award hi sem a lo ni tawh a, ngaihhlut pawh a hlawh hle. Tun ṭuma award sem tur hian hemi hnu lama film chhuak, December 2021 leh August 2023 inkara Mizo film chhuak zawng zawngte a huam a ni.

Award hi category 12-ah sem a ni dawn a, category tinah hian mipuite vote lak tel a ni a, vote pawh a tla ṭha thawkhat hle. People's Choice Award chu mipui vote hmanga thlan chhuah a ni. Mapuia Chongthu hnenah Lifetime Achievement Award hlan a ni dawn bawk.

Zanina Vanapa Hall-a Mizo Film Award semna hi Zonet anchor hriat hlawh, Zonuni Pachuau chuan a host dawn a, Mizo artist kan neih ṭhat tak takte an perform dawn bawk a ni. Zai bakah lam hmuhnawm tak tak en tur a awm bawk ang. Award sem zan hian Mizo film star boralte sunna hun hman a nih dawn bakah, piracy duh lohzia lantirna hun hman a ni ang.

A chhim duh tan a hmunah ticket lei tur a awm dawn a; LPS HD, Zonet Bawhbel leh Tlau Entertainment YouTube channel-ah live-a pek chhuah a ni dawn bawk.