Zaninah Mizo horror movie ‘The Hut’

Mizo horror movie, 'The Hut' chu zanin dar 8:30 hian Thulkhung App-ah en theih a ni dawn ta.

He movie hi nikum lama tihchhuah tura release tawh a ni a, mahse, en theihna tura an ruahman, V-Tech Apps chu a puitlin tak loh avangin a tangkhang a, mipui hmuh theiha tarchhuah a ni ta lo. Mahse zanin aṭangin Thulkhung App-ah Rs 200 in lei theih a ni ang.

Minutte 47-a thui, short horror film a ni a, a film tir aṭanga a tawp thlengin a hrang tluan deuh vek dawn. Mizo thlahrang film tam zawk kan lo hmuh ṭhin, thlahrang kawrfual var ha ṭhin ngawt ang ni loin, thlahrang danglam deuh a inlar dawn a ni. A film changtute hi social media a han lar fal deuh emaw an awm hran lova, an character role play erawh an hnehsawh tlang hle. Shooting hi nikum thlasik laia neih niin, visual effect leh after effect a hautak a, film quality ṭha tak tura ngaih a ni.

Film producer hi C. Hmingthangvunga a ni a; script, camera, editing & direction hi H.Lalchhuanawma, V-Tech Entertainment kutchhuak a ni.