Mood Station Ka Chiri a chhuak dawn e

'Zopunk Culture' (2nd album) chhuah hnu, kum khat leh a chanve vel chhung content an neih loh hnuah, Mood Station 'Ka Chiri' single a rawn chhuak dawn ta. Inrinni, September 30 zan dar 8:00-ah Mood Station Official YT channel-ah dah chhuah a ni ang.

Mood Station hi a changa one man band, full(dummer,keys,bass)band a kal a ni a, 2010 a din tawh niin, a khaipa Ṭpa hi music composer/producer a ni. Music videos/ lyrical videos,live performances, audios-te Mood Station YT channel-ah hian dah chhuah nual a ni tawh bawk. Ṭpa chuan, "Mizo hlaa an phuah ngai loh tur, fawm khawm a, chutiang ang chu hlaa siam a nuam ka ti. Tunah hian hla dang 'Ka Suffer' leh 'Hun' pawh chhuak tur a awm a ni. A hla pathum hian inzawmna an nei a, ka hla siamho hi nursery rhymes ang a ni a , hriatthiam har tur a awm lo a, naupang rimawi tui tirin an tum thiam mai theih tur hla ang siam hi a nuamin, ka duhthusam hla a ni fo ṭhin," a ti.

"Punk (late 70's till early 2000 nu metal era) hi ka tuichilh a, a music chu thu hran ni se, an attitude a hi, DIY, leh tihdan tur bik, thiam uchuak a ngaih lohna lai takte hi ka duhna chhan a ni, chutiang chuan tuna kan production pawh hi kan kalpui dawn a ni. Kan bungrua, thiamna leh theihna, tuna kan ban phaka awm hi kan hmang thiam mai ang," tiin Vanglaini a hrilh.