Lauren Daigle-in thlipui tuarte pualin Online concert buatsaih dawn

Grammy award pahnih lai dawng tawh leh Dove award phei chu eng emaw zat lo dawng tawhtu Lauren Daigle leh a foundation The Price Fund chuan thlipui na tak, Hurricane Laura tuarte chhawmdawlna turin online streaming concert an buatsaih dawn.

Hurricane Laura hian August 27 khan U.S-a Louisiana state chu na takin a nuai a, chhungkaw sang chuangin harsatna an tawh bakah thlipui tleh vanga bungraw chan chu $tluklehdingawn 10 hu vel niin an chhut.

Hemi a nih avang hian Christian artist lar tak Lauren Daigle hian heng harsatna tuarte chhawmdawlna pual hian October 11 hian online concert hi buatsaih a tum ta a ni.

Concert hi Orpheum Theater, New Orleans-ah live a record a ni dawn a, Grammy award a dawnna hla 'You Say' leh a platinum certify hla 'Rescue'-te a sa dawn a, heng bakah hian a hla lar tam tak leh hla tharte pawh a sa dawn a ni.

Daigle-i concert hi Veeps chuan October 11 EST dar 8-ah a pe chhuak dawn a, darkar 48 chhung a en theih dawn a ni. Concert aṭanga a sum hmuh chhuah zawng zawng chu Hurricane Laura tuartute tana chhawmdawlna hna thawk mek, eitur leh riahna buatsaih saktu The Salvation Army leh American Red Cross-ah a lut dawn a, ticket man hi $25 aṭangin a inṭan a ni.

Louisiana hi Daigle-i seilenna hmun niin amah ngei pawh hi thlipui na tak tuartu zingah a lo tel tawh. "Naupang ka nih lai chuan, Louisiana-a seilian ka nih angin, thlipui (hurricane)-in min lo nuai tawh a. Eng harsatna nasa tak nge an thlen pawh ka hria a ni. Khawvelah thil dang tam tak thleng mah se thlipui tuartute tana chhawmdawl hna thawh kawngah hian min zawm ve turin ka sawm che u a ni," tiin a concert chu chhim turin midang a sawm.

Kum 29 mi Lauren Daigle hian studio album pathum a tichhuak tawh a, tunlai khawvela Christian music singer hlawhtling ber zinga mi niin a album hmasa ber kum 2015-a a tlangzarh, 'How Can It Be' chu  Billboard Top Christian Albums chart-ah No.1 a ni hial. GMA Dove award pasarih lai a dawng tawh a, American Music Awards pahnih dawng tawhin  Billboard Christian Airplay leh Hot Christian Songs chart-a chart topper single pali lai a nei tawh bawk.