Michael W. Smith Album ‘STILL’ October 9-ah

Christian music veteran Michael W. Smith chuan a album thar ber 'Still' chu October 9 hian a tlangzarh dawn.

Michael W. Smith chuan Still chu a nupui Debbie nena kum tam tak an lo ruahman tawh a nih thu a sawi. "Kan khawvelah hian thawm ṭha lo hriat tur tam tak a awm a, chumi avang chuan a chang chuan hun insiam a, awm hle hlea Pathian hnena ṭawngṭai kan theihnghilh ṭhin. Ka ṭawngṭaina chu hei hi a ni, he rimawi hian a ngaithlatute chu Pathian lama rilru sawrbinga A thu chhiar tura hun an in­siamna tur a thlen hi," tiin a worship album thar tur chungchang chu a sawi.

Smith hi kum 62 laia upa a ni tawh a, chuti chung chuan album thar a la tichhuak dawn a ni. Grammy pathum lai a dawng tawh a, Dove award phei chu 45 lai dawng tawhin rimawi lama hlawhtlinna a lo neih tawhte chu tarlan sen pawh a ni lo ang. Tuna a album tihchhuah thar tur hi a album 23-na tur a ni tawh. A album hmasa ber chu kum 1983-a a tlangzarh daih tawh kha a ni a, "Still' hi kum 2018 hnua a album tihchhuah leh hmasa ber tur a ni.