High School leh Higher Secondary School tan State level Solo & Beat Contest buatsaih dawn

Art & Culture department leh Education department ṭangkawp chuan December, 2023 chhung hian High School leh Higher Secondary School naupang tan, state level Solo & Beat Contest an buatsaih dawn.

Intihsiaknaah hian School pakhat aṭangin mal zai mi pahnih leh band pahnih thleng tel theih a ni dawn a, audition round hi virtual-a neih a ni ang a, Top 10 aṭangin live-a intihsiak tur a ni ang. Solo-ah hian Mizo hla pakhat sak tur a ni a, Beat contest-ah hla 2, Mizo hla pakhat leh an duh duh hla dang pakhat sak phalsak an ni.

Intihsiaknaa tel turte tan October 31 aia tlai loah Art & Culture Department-ah hming theh luh tur a ni a, WhatsApp number 7005934259-ah address leh WhatsApp number nen theh luh theih a ni ang. Audition-a mi tur video clip hi November 24 aia tlai loah mobile no +91 7005934259 (Telegram App.) emaw, mizoramartculture@gmail.com emaw ah theh luh theih a ni bawk ang.

Video clip theh luh aṭangin Solo leh Beat Contest-a top 10-te hi thlan a ni dawn a, November 30 zanah “A&C Mizoram”YouTube channel-ah top 10 puan a ni dawn a, a tlingte hi December 8 chhunah Vanapa Hall-ah intihsiakin hei hi final round a ni nghal ang. Competition Guidelines hi Art & Culture Department, Mizoram Website-ah en theih a ni. Solo & Beat Contest-ah hian mimal lawmman pawh siam a ni dawn bawk.