Vanglaini Bihchianna - Entrepreneur Huang : Zolen Papers

Mizorama toilet paper/tissue roll siam chhuak hmasa ber, Zolen Papers chu tun ṭum hian Vanglaini chuan bihchianna a nei a -

Bul ṭan dan:
Zolên Papers hian kum 2022-ah bul an ṭan a, toilet paper/tissue roll hi Kulikawn Ngaizel-ah siamin an hralh chhuak ṭan a ni. Zolên Papers neitupa, Lalawmpuia chuan an bul ṭan dan sawiin, "Mizoramah tui a vang a, tui haw loh hleka buai ṭhin kan ni tlangpui awm e. Chu harsatna chu keini pawhin kan tâwk ve a, tui ren nan leh han inhruk mai nante toilet paper hi kan hmang fo a; chutia kan han lei ve fo takah chuan a market hi thiam ang tawkin kan han zir chiang ve a, kan rin ai daihin mi chhungkuain an lo hmang nasa tawh tih kan zir chhuak ta a ni," a ti.
"Sum nei sa kan nih lem loh avangin ngun taka inchhut kan ngai a, uluk taka kan zir leh ngaihtuah hnuah India rama khawl an supply ṭhat theih berte chah chhuakin bul kan han ṭan ve ta rawih a ni," tiin a sawi.

An tum ber:
Zolên Papers hian 2ply toilet paper roll hi chi hnih, virgin leh recycled hmangin an siam. Virgin hi a nêmin a var ṭha a, recycled hi a zawp har zawk hret thung. Pathianin rem a tih chuan paper product hrang hrang siam chhuah zel theih zel an tum. Plastic lam thil hman khapna thupekte a khauh zel avangin paper aṭanga siam chhuah thil hrang hrang hi Mizote ngei pawhin kan hmang nasa tawh a, state pâwn aṭang leh kan ṭhenawm foreign ram aṭangte hian a lo lut nasa hle. Chumi hre ranin ram dang aṭanga lak luh aia tihtlawm an tum a, hlep tlem zawkin a man pawh an bituk a ni. Mizo ṭhalaite tana eizawnna siamsak theih an tum.

Thawktu neih dan:
Chhungkuaa an thawh bakah hian part-time a chhawr hi an nei ṭhin bawk. An thil siamnaah hian ṭum khatah a tlem berah pali tal thawh a ngai ṭhin a; a siam chhuahna ber khâwl operator a ngai a, a zai têtna khawl operator bakah, a packaging lamah hian pahnih tal hi awm a ngai ṭhin.

Zawrh chhuah dan:
A tlangpuiin wholesale-in an pe chhuak ṭhin. Bulk-a la a, wholesale a pe chhuak an awm bawk. Wholesale hian MRP aia tlawmin hralh chhuah leh theih turin an pe chhuak, bulk erawh chu a hlâwm lian deuh hlekin an la a, wholesale rate aia tlawma lain wholesale rate-in an sem ve leh ṭhin.
Virgin leh recycled raw material hmanga siam an nei a, virgin hi a nêm bakah a lang var bik a, toilet paper hmang ṭhang tam takin an duh. Recycled hi Mizo ril rem zawng a nih zawk hmel a, stock an nei hman meuh lo. Recycled hi laboratory hrang hrang hian a hlawmin an la nasa a, testing equipment hrukna atan a hmul a tla lo an ti a, an ṭangkaipui hle. Zolên Papers 2ply toilet paper hi online a chah theih leh ram dang aṭanga chah luh tam tak aiin a hlûm (pulls) a tam a, toilet paper kan hmana ninawm tak, a pawh thlêr/pawh bun harsa awm ṭhin duh loin, a pawh thlêrna tur pawh ṭha takin an duang a ni.

Hmachhawp:
Opa chuan, "Tih châk leh nasa taka ṭhan theihna tur kan hriat ṭhûm rualin tuna kan khâwl neihah hian kan sum invest a tam ve si a, Pathianin min kaihruai anga muangchangin hma kan la sawn ang. Ram danga sum luang chhuak tur Mizorama kan hum theih nan hian paper product hrang hrang siam chhuah vek theih hi kan tum lian ber a ni," tiin Vanglaini a hrilh

Harsatna tawh:
Mizorama manufaturing industry lamin harsatna an tawh lian ber chu thil phurhna leh power supply lam a ni. "Phaiah, hmun leh hmunah thil an siam chhuak a, siam chhuah sain an rawn phur chho a, khami lo el kha chu a harsa khawp mai. Phurh manah kan inseng nasa a, 'support the local chu a to ṭhin' an tih hi "A lo âwm khawp mai" kan ti ve vawng vawng a ni," tiin Opa chuan a sawi. Electric a thih hlek chuan hna an thawk thei lo zui ve nghal zel a ni.

Mizo-te kan rilru puthmang a changkang tawhin, kan Mizo pui thil siam chhuah kan support-in kan ngaisang thiam ve tawh hle. Hemi rual hian Mizo siam chhuah a nih avanga sawisel chak tlat an la awm ve bawk a, an siam chhuahna raw material hi phai lam nen inang reng tho mah se 'local' bik riaua ngai an awm ṭhin. "Kan sumdawnna hmingah Mizo hming kan lo phuahte hi a inchhirawm lek lek zawk em aw tih chang a awm ve fo mai!," tiin Opa chuan a sawi.

Entrepreneurship
Zolên Papers neitu, Op-a chuan, "Mizoramah hian mahni kutkawiha eizawnna bul ṭan theih thil hi a tam em em a, thil danglam lutuk, bung thar hlak kai theihna lam ni tura kan inbeisei lutukna lamah hian ṭhalaite hian helam kawnga ke pen hi harsa kan ti mai mai ni hian kan ngai. Thil simple ve tak, ram danga mi rinrâwla kan hman angte hi han zir chiang ila, kan rama siam chhuah ve harsa lutuk lo turte hi ngaihtuah ila, chumi aṭang chuan ngaihtuahna zau zawk a neih theihin ka hre ṭhin," a ti.

Hemi rual hian fimkhur a ngaih ve thu sawiin, miin idea thar nena eizawnna bul a ṭan mek laia a idea ringa bul ṭan hmasatu vuak chhiat hreh miah lo emaw tih mai tura rawn lut ve leh thâwr hreh lo hi an tam ve hle tih a sawi. "Inlungrual taka thawhho leh intichhe tawn loa kan inel hi a Mizo em em a, a Kristian em em bawk a ni," tiin a sawi.