THE PRETTY RECKLESS album tharah TOM MORELLO

The Pretty Reckless front­woman Taylor Momsen chuan an album tihchhuah thar tur 'Death By Rock And Roll'-ah Rage Against The Machine guitarist Tom Morello an thawhpui thu a sawi.

'Death By Rock And Roll'-ah hian Tom Morelli chauh hi an thawhpui dawn lo a, rock band lar tak Soundgarden member pahnih Kum Thayil leh Matt Ca­meron an thawhpui tih a sawi bawk.

Tom Morello hian 'And So It Went' tih hlaah a pui a, Matt Cameron leh Kim Thayil-te hian 'Only Love Can Save Me Now'-ah an pui thung a ni.

Detroit WRIF radio station Meltdown-in an interview-naah Taylor Momsen chuan hemi chungchang hi sawiin 'Only Love Can Save Me Now' hi Seattle-a London Bridge Studio-ah an record tih a sawi bawk.

Tom Morello-te band Audioslave singer fam ta Chris Cornell kha Soundgarden vocalist ṭhin hi a ni bawk a, Momsen hi Chris Cornell ngaihsangtu a ni bawk. Hemi chungchang hi Momsen chuan sawi chhuakin Chris Cornell thihna kha a tuar hle tih a sawi a, a thih pawh khan The Pretty Reckless hian twitter-ah an tuar thu tarlangin, Audioslave hla 'Like A Stone' pawh khan ṭum eng emaw zat an cover tawh a ni. Momsen bik pawh hian Instagram-ah a rilru hrehawm thu tarlangin, a ṭhawng hle tih a sawi. 

Cornell intihhlum hma lawk May 17, 2017 khan Detroit-ah hian Soundgarden concert chu The Pretty Reckless hian an open sak nghe nghe. Hemi vang hian Cornell-a lam hnai musician ropui pathum an thawhpui pawh hi a mak lo hle.

Meltdown-in an interview-naah hian Taylor Momsen chuan music-in ṭum eng emaw zat a nunna a chhan thu a sawi.

Hun harsa tak a tawk fo tih leh depression vanga a buai viau hnu pawhin music chuan a chhanchhuak leh ṭhin. A hreh­awmna lak ata a chhuah theihna turin hla a phuah ṭhin tih a sawi. "Ka sawi ngun in ti mai thei, mahse music hian ka nun a chhanchhuak fo a ni- ka innghah ngamna leh ka tana awm reng a ni. Music hian min awmpui reng a, chuvang chuan keipawhin ka ngaina a ni," a ti.