Gladiator chhunzawmna? Connie Nielsen a chang leh dawn?

Kum 2000-a tihchhuah daih tawh historical dra­ma film Gladiator kha a chhunzawmna an siam dawn niin a changtunu Danish actress chhe lo tak mai  Connie Nielsen chuan a sawi a, chan ve leh a chak thu a sawi zui bawk.

Oscar hial pawh dawng thei film Gladiator hi tlangzarh a nih aṭangin kum 20 lai a liam tawh a, heti chung hian Connie Nielsen chuan a chhunzawmna an siam leh dawn tih thawm a awm thu a sawi a, film siamtu lamin engmah thu­chhuah la siam lo mah se Gladiator hmuhnawm titute beng chu a verh ngei ang.

Nielsen chuan a cha­racter ngai Lucilla-ah chan chhunzawm leh a chak thu  Entertainment Weekly-in an interview-naah a sawi a ni. Studio lama an hotute chuan  Gladiator chhunzawmna siam tur chungchangah hian 'greenlight' an pe tih sawiin,  Russell Crowe chungchang erawh engmah sawi lan a ni lo thung.

Gladiator hi tlangzarh a nih tirh aṭang khan film boruak nei lian tak a ni a, box office-ah pawh $mtd 460.5 lai hmu chhuakin, film critics lam pawhin an fak hle. Film lama award ngaihhlut tak tak a hui hnem hle a, 73rd Academy award pawh panga lai huiin  Best Picture, Best Actor, Best Costume Design, Best Sound leh Best Visual Effects-te a la a ni. Academy award hetiang zat la thei hi sawi tur an tam lo a, hei hian he film hmuhnawm zia hi a tilangchiang awm e.

BAFTA Awards pawh pali lai a dawng bawk a, a chhunzawmna an siam a nih chuan a 'hit' leh ngei ang tih a rinawm.