Megan Fox leh Machine Gun Kelly an ni lo: Green

Lemchan thiam Megan Fox leh American rapper Machine Gun Kelly-te chu an inngaizawng niin thuthang a tam hle a, mahse Fox pasal hlui Brian Austin Green chuan ṭhian chauh an nih thu sawiin, tun dinhmunah chuan an inngaihzawn loh thu a sawi.

Green hian podcast a tihchhuah hnuhnung berah Fox nen hian an awm hran thu a sawi a, nikuma Midnight in the Switchgrass film shooting neia a kal hnu khan kum 10 zet innei tawh mah se awm hran duhna Fox hian a nei tih a sawi bawk.

Nilaini khan Kelly chuan a music video thar Bloody Valentine a tichhuak a, he music video-ah hian Fox hi model-ah a hmang a ni. Fox leh Kelly hi an chhuak dun lai hmuh an lo ni tawh bawk a, heng avang hian an inngaizawng niin mi tam tak chuan an ringa, mahse anmahni lam hian thuchiang engmah an la sawi lo.

Megan Fox leh Brian Austin Green hi kum 2010 khan an innei a, fa pathum an nei tawh a ni. Green chuan a podcast kaltlang hian Fox chu a hmangaih reng tur thu a sawi a, tunah awm hrang rih mah se nakinah an la awm dun leh mai thei niin a sawi.